«Tramadol» atyraýlyq chempıonnyń kóz jumýyna sebepshi boldy
Oqıǵa Atyraý qalasynda bolǵan. Psıhotropty preparattyń áserinen er adam kóptiń kózinshe ózine-ózi pyshaq suqqan. Shaqyrtýmen jetken polıtseıler ony toqtatpaq bolady. Biraq, kóp qan joǵaltqan turǵyn kóz jumdy. Bul jaıttyń vıdeosy áleýmettik jelide tarady.
Atyraý oblystyq polıtsııa departamentiniń baspasóz qyzmetinen málim etkendeı, QR Qylmystyq kodeksiniń 105-babymen (Ózin-ózi óltirýge deıin jetkizý) sotqa deıingi tergeý bastalǵan. Sot-medıtsınalyq saraptama taǵaıyndaldy.
Marqum erkin kúresten túrli jarystarda chempıon atanǵan tanymal sportshy edi.
Eske sala ketelik, budan buryn Atyraýda Nıgerııa azamaty psıhotropty zattardy saqtaǵany úshin 6 jylǵa sottalǵanyn habarlaǵan bolatynbyz. Polıtsııa qyzmetkerleri byltyrǵy 20 shildede jedel-izdestirý is-sharalaryn júrgizip, Nıgerııa azamaty E.-ni ustaǵan. Onyń avtokóligin tintý kezinde júrgizýshi jaǵyndaǵy kilemshe astynan jalpy salmaǵy 4,29 gramm «mefedron (4-metılmetkatınon)» psıhotropty zaty tabylǵan. Sottalýshy E.-niń kinási kýágerlerdiń jaýaptarymen, avtokólikti qarap-tekserý hattamasymen, saraptama qorytyndylarymen dáleldengen. Sot úkimimen oǵan 6 jyl merzimge bas bostandyǵynan aıyrý jazasy taǵaıyndaldy.
Sondaı-aq, Atyraýda keıingi 2 jylda 18 myń danadan astam psıhotropty dári tárkilengenin jazǵan edik. Esirtki qylmysyna qarsy is-qımyl basqarmasy men patrýldik polıtsııa batalonynyń qyzmetkerleri, ýchaskelik polıtsııa ınspektorlary 2021 jyldan beri zańsyz aınalymnan 18 myńnan astam psıhotropty dári-dármekterdi tárkilegen.