Tozý deńgeıi 70 paıyzdan asqan 1 600 shaqyrym jylý jelisi jóndeledi

ASTANA. QazAqparat – Jylý jelilerin jańartý úshin qazynadan nysanaly transfert bólinýi múmkin. Premer-Mınıstr Álıhan Smaıylov Úkimet otyrysynda Qarjy mınıstrligine osyndaı tapsyrma berdi, dep habarlaıdy QazAqparat tilshisi.

«Energetıka mınıstrligi elektr stansalaryn tekserýdi 2023 jyldyń birinshi toqsanynda aıaqtaýy kerek. Bul salada qalyptasqan naqty jaǵdaıdy bilý úshin tekserý jumystary sapaly ári eshqandaı burmalaýsyz, shynaıy júrýi tıis. Kelesi jyldan bastap jylý jelilerin jóndeý boıynsha aýqymdy baǵdarlama bastalady. Birinshi kezekte tozý deńgeıi 70%-ten asyp ketken jylý jelileri aýystyrylady. Mundaı jeliler - 1600 shaqyrym. Ekinshi kezeńde 4 myń kılometrge jýyq jeli jańartylady. Bul - óte aýqymdy jumys ári kóp qarajatty talap etedi», -degen Álıhan Smaıylov óńir ákimderine tapsyrma berdi.

«Birinshi. Óńir ákimdikteri jekemenshik energetıkalyq jáne ınfraqurylymdyq obektilerdiń jaǵdaıyn keshendi túrde qarasyn.

Jylý jelilerin rekonstrýktsııalaý boıynsha qajetti qujattardy ázirleý jumysyn birinshi jartyjyldyqta aıaqtaý qajet.

Ekinshi.Qarjy mınıstrligi jylý jelilerin rekonstrýktsııalaýdy qarjylandyrý úshin nysanaly transfertter bólý máselesin pysyqtasyn.

Úshinshi.Energetıka jáne Ulttyq ekonomıka mınıstrlikteri eki apta ishinde memlekettik energetıkalyq baqylaýdy kúsheıtý tásilderin qarastyrsyn», - dedi Úkimet basshysy.