Tozyǵy jetken úıler: Almatyda jańartý baǵdarlamasy qabyldanbaq

<p>ALMATY. KAZINFORM &ndash; Almatyda eski úılerdi jańartý baǵdarlamasyn osy jyldyń qyrkúıek aıynyń sońyna deıin qabyldaý josparda. Bul týraly Almaty qalasynyń ákimi Erbolat Dosaev Medeý aýdanynyń turǵyndarymen kezdesý barysynda aıtty.</p>

Medeý aýdanynyń turǵyny Marııa Tursynbaeva qala basshysynan Tóle bı men Abdýllın kósheleriniń qıylysynda ornalasqan 1937 jyly salynǵan 6 páterli úıdiń qashan buzylatynyn surady.

«Bul problema Medeý aýdanyna ǵana emes, Túrksib, Jetisý aýdandaryna da qatysty. Másele mynada boldy, bul zańmen bekitilmegen. Shilde aıynda Memleket basshysy zańǵa engizilgen ózgeristerdi qoldap, qol qoıdy jáne biz qazir jumys isteı alatyn jańartý uǵymy paıda boldy. Qazir Almaty qalasyn jańǵyrtýdyń tıisti baǵdarlamasy orta merzimdi perspektıvada daıyndalyp jatyr. Biz talqylaýlardy aıaqtap, qyrkúıek aıynyń sońyna deıin qabyldaýǵa tyrysamyz, sonyń aıasynda jumys isteıtin bolamyz», - dep jaýap berdi Erbolat Dosaev.

Megapolıs ákimi tozyǵy jetken turǵyn úıler men buzylatyn úıler úsh sanatqa bólinetinin aıtty: ınvestıtsııalyq tartymdy, ınvestorlar óz qarajattaryn salýǵa daıyn; ınvestıtsııalyq tartymsyz, qala ákimdigi aınalysatyn bolady; úshinshisi, úıler ınfraqurylymdy damytý úshin satyp alynǵanda.

«Qonys aýdarý qory quryldy, alaıda tozyǵy jetken úılerden turǵyndardyń ózderi 100 paıyz kelisim bergen jaǵdaıda ǵana kóshiriledi», - dep atap ótti qala basshysy.

Medeý aýdanynyń ákimi Erkebulan Orazalın bul úıdiń turǵyndarymen kezdesý ótkizilgenin jetkizdi.

«Úıdiń jartysy qyzyl syzyqta, ıaǵnı ınvestorlar úshin qyzyǵýshylyq joq. Kúrdeli qurylys kásiporny turǵyn úı qorynan páter usyndy, alaıda kórshiler bas tartty», - dedi aýdan ákimi.

Ýaqytsha shara retinde aýdan turǵyny úıdi jóndeýdi surady. Qala basshysy aýdan ákimine «Halyq qatysatyn bıýdjet» baǵdarlamasy boıynsha úıdi jóndeýden ótkizý múmkindigin qarastyrýdy tapsyrdy.