Tótenshe jaǵdaılar mınıstrliginiń apattyń aldyn alý mindeti umytyldy - Nurtóre Júsip

ASTANA. QazAqparat - Elimizde tabıǵı jáne tehnogendik sıpattaǵy apattar jyl saıyn kóbeıip barady. Senator Nurtóre Júsip Premer-Mınıstr Álıhan Smaıylovtyń atyna joldaǵan depýtattyq saýalynda osy saladaǵy tetikterdi jetildirý týraly aıtty, dep habarlaıdy QazAqparat tilshisi.

«Sý tasqyny, qar kóshkini, sel men jańbyr, dala men ormandaǵy órtter kóbeıdi. Jaqynda Ekibastuzda apat boldy. Memleket basshysynyń tapsyrmasy boıynsha Úkimet músheleri qalanyń jylý ortalyqtarynda bolǵan avarııa saldaryn baqylaý úshin qaıta-qaıta shapqylap jatyr. Tótenshe jaǵdaıdaǵy basty uran: «Aldyn alý, qutqarý jáne kómek berý» bolýy tıis. Kóp jaǵdaıda biz tek qana qutqarý men kómek berý isimen aınalysyp kelemiz. Adamdardyń ómiri men densaýlyǵyna tónetin qaýip-qaterdiń aldyn alý Tótenshe jaǵdaılar mınıstrligi organdarynyń tikeleı mindeti ekeni ylǵı umytylyp qalady. Nelikten bulaı?», - dedi N. Júsip Senattyń jalpy otyrysynda.

Sonymen qatar, senator apat bolǵan kezde Úkimet óz mindetterin oryndap, tez áreket etýdiń ornyna Prezıdenttiń nusqaýyn kútip qalatyny, sóıtip problemalardy sheshý protsesin keshiktiretinin túsine almaıtynyn aıtty. Senator Úkimet basshysynyń atyna aıtqan usynystardyń ishinde asa mańyzdy nysandarǵa qaýipsizdiktiń keshendi júıesin engizýdiń mańyzyn atap ótti.

«Biryńǵaı geoınformatsııalyq júıege monıtorıng jasaý arqyly barlyq jerde ıntegratsııalanǵan qaýipsizdik júıesin engizý kerek. Atqarýshy bılik pen Tótenshe jaǵdaılar mınıstrligi qyzmetin baǵalaýda mindetti túrde halyqty jáne sol aýmaqtardy qorǵaý isinde aldyn alý sharalaryn qalaı jasap jatqany eskerilse deımin», - dedi senator.

Depýtat sondaı-aq barlyq deńgeıdegi tıisti laýazymdy tulǵalardyń tótenshe jaǵdaıdyń aldyn alý jáne órt, sý jáne tehnogendik qaýipsizdikti uıymdastyrý jóninde naqty jumys júrgizgeni úshin jeke jaýapkershiligin engizýdi usyndy.