Tótenshe jaǵdaılar mınıstrligi 16 tikushaq satyp almaq
«Álemde orman ári dala órti kóbeıgeni baıqalyp otyr. Qazaqstanda úsh jyl buryn 700 orman órti tirkelse, byltyr 757 órt boldy. Qazirdiń ózinde 146 orman órti tirkeldi. Órtke qarsy qyzmetterdi qamtamasyz etý, jabdyqtaý máselesine toqtalsaq, eldi mekenderdi órtten qorǵap jatqan 426 órt sóndirý bólimi uıymdastyrylǵan. Alaıda normatıv deńgeıine jetý úshin taǵy da 121 osyndaı bólimdi salý kerek», - dedi I. Kúlshimbaev Senattyń jalpy otyrysynda.
Onyń aıtýynsha, jol kartasy boıynsha el aýmaǵynda 21 órt sóndirý beketiniń qurylysy júrip jatyr. Keıingi 10 jylda 18 nysan ǵana salynǵan. Byltyrdan beri bul baǵyttaǵy jumystar kúsheıtildi.
«Tehnıka jaıynda aıtatyn bolsaq, Tótenshe jaǵdaılar mınıstrliginiń tehnıkamen jabdyqtalýy 80 paıyz deńgeıinde. 3600-den astam tehnıka bolýy kerek, qazir sonyń 3200-i bizde bar, ıaǵnı 430 tehnıka qajet. Atap aıtqanda, 470 tehnıkany paıdalaný merzimi 20 jyldan asyp ketken», - dedi vıtse-mınıstr.
Onyń sózine qaraǵanda, bul máseleni sheshý úshin Memleket basshysynyń tapsyrmasy aıasynda keshendi jospar ázirlendi.
«Naýryz aıynda respýblıkalyq bıýdjet komıssııasy otyrysynda 605 mlrd teńge maquldanyp, sonyń 536 mlrd teńgesi Tótenshe jaǵdaılar mınıstrligine, 48 mlrd teńgesi Ekologııa mınıstrligine, jáne 20 mlrd teńgesi jergilikti atqarýshy organdaryna qarastyrylǵan.
Sonymen qatar, áýe qutqarý júıesin damytý úshin keıingi úsh jylda 11 tikushaq alyndy. Keshendi jospar aıasynda 2027 jylǵa deıin taǵy 16 tikushaq jetkiziledi», - dedi Ibragım Kúlshimbaev.
Budan bólek ol baspanasyz júrgen qyzmetkerlerge ótemaqy retinde beriletin qarajat qarastyrylyp jatqanyn aıtty.
Aıta keteıik, Tótenshe jaǵdaılar mınıstrliginde jalpy 33 tikushaq bar.