Tótenshe jaǵdaılar mınıstri erlik tanytqan jasóspirimderdi marapattady

SEMEI. QazAqparat – Semeı qalasynda sýǵa batyp bara jatqan balany qutqaryp qalǵan 7-synyp oqýshysy men kolledj stýdenti marapattaldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, oqıǵa 1 mamyr kúni bolǵan. Balalar ózen jaǵasyna serýenge shyqqan.

«Sýǵa sekirgen 11 jasar bala jaǵaǵa jete almaı, bata bastaǵan. Sol kezde Semeı qalasyndaǵy Qurylys kolledjiniń 2-kýrs stýdenti Danıla Kondratenko lezde kómekke umtylyp, ony sýdan alyp shyqqan. Al balanyń synyptasy Rýslan Omarov dárigerler kelip jetkenge deıin alǵashqy medıtsınalyq kómek kórsetti. Sonyń arqasynda oqýshy aman qalǵan», - delingen aqparatta.

Zardap shegýshi oblystyq Balalar aýrýhanasyna jatqyzyldy. Qazirgi ýaqytta ol dárigerler baqylaýynda.

«Rýslan Omarov pen Danıla Kondratenko erlik tanytyp, adam janyn ajaldan arashalap qaldy. Syn saǵatta batyl áreket etken olar ózderin batyr sanamaıtynyn aıtady. Qazaqstan Respýblıkasy Tótenshe jaǵdaılar mınıstriniń buıryǵymen ekeýi Qurmet gramotasymen marapattaldy», - delingen habarlamada.

Esterińizge sala ketsek, osyǵan deıin Semeıde 7-synyp oqýshysy Ertiske batyp bara jatqan dosyn qutqaryp qalǵanyn habarlaǵan edik.