Tótenshe jaǵdaılar mınıstri «jeke quramnan aqsha jınaý» faktisi týraly pikir bildirdi

<p>Tótenshe jaǵdaılar mınıstrliginiń jeke quramyna aqsha jınaý derekteri boıynsha saýalnama júrgiziledi. Bul jaıynda mınıstr Syrym Sháriphanov Úkimet otyrysynan keıin ótken baspasóz máslıhatynda málim etti, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

Buǵan deıin Tótenshe jaǵdaılar mınıstrligi Zýıalhan Gasanovtyń Túrkistan oblysynyń qutqarýshylarynan Tótenshe jaǵdaılar mınıstrine aqsha jınaý týraly málimdemesine qatysty túsinikteme bergen edi.

«Shynymen de, sondaı úndeý bolǵan. Biz keshe resmı jaýap berdik. Meniń ustanymym – adal ómir súrip, adal eńbek etý. Sondyqtan ol úndeýde kórsetilgen faktiler orynsyz. Bul baǵytta belsendi jumys júrgizemiz. Biz ashyqpyz. Osy laýazymdaǵy jumysqa kirisip bastaǵan kezde-aq osylaı aıtqam. Sybaılas jemqorlyqqa qarsy qyzmetpen tyǵyz jumys isteımiz. Birqatar úlken shara ótkizgenimizdi BAQ-tan bilip otyrsyzdar. Sondyqtan dál osy atalǵan fakti boıynsha tekserý júrgizemiz. Faktiler anyqtalǵan jaǵdaıda jaýaptylar jazalanady. Al eger bul jala ekenin málim bolsa, málimet taratýshyny sotqa berý máselesi bekitilgen tártip boıynsha jasalady», - dedi ol.

Jýrnalıst mınıstrlik úndeýdegi faktini resmı túrde teriske shyǵarǵan bolsa, tekserý ne úshin jasalatanyn surady.

«Jeke quramǵa taǵy bir ret saýalnama júrgizemiz. Tekserý osy maqsatqa baǵyttalady. Odan bólek mende WatsApp-chat bar. Jeke quramnyń bárine ol týraly málimet berilgen. Ol chatqa da osynadı málimet tússe, mindetti túrde tekserý júrgizemiz», - dedi Syrym Sháriphanov.