Tótenshe jaǵdaılar mınıstri el turǵyndaryna úndeý jarııalady
"30 jeltoqsannan 3 qańtar aralyǵynda TJM bólimsheleri tótenshe jaǵdaılarǵa jedel den qoıý úshin qyzmettiń kúsheıtilgen rejımine kóshti. Kúshter men quraldar turaqty ázirlikte tur.
Mereke kúnderi aýa raıynyń qolaısyzdyǵyna baılanysty azamattardan daýyldy eskertýlerdi, aýa raıynyń ózgerýin, joldardyń jabylýy týraly habarlamalardy baqylaýdy, sondaı-aq alys saparǵa shyqpaýdy suraımyn.
Aýyldyq jerlerde turatyn turǵyndarǵa aýa raıy nasharlaǵan jaǵdaıda alys qashyqtyqqa jaıaý júrýden bas tartýdy usynamyn.
Qazirgi ýaqytta aýa-raıynyń kúrt jylynýyna baılanysty elimizdiń keıbir óńirlerinde sý aıdyndarynda muzdyń juqarǵany baıqalady. Osyǵan baılanysty azamattardan juqa muzǵa shyqpaýdy jáne qaýipsiz júris-turys erejelerin qatań saqtaýdy suraımyn!" delingen habarlamada.
Sondaı-aq, mınıstr jańajyldyq is-sharalardy uıymdastyrýshylar men azamattardy órt qaýipsizdigi erejeleriniń talaptaryn saqtaýǵa shaqyrdy. Úı-jaıda otshashýlar men órtke ákelýi múmkin basqa da órt qaýipti jaryq áseri bar quraldardy paıdalanýǵa bolmaıtynyn eskertti.
"Pırotehnıkalyq quraldardy abaısyz qoldaný órttiń paıda bolýyna ǵana emes, sonymen qatar jaraqat pen mertigýge ákelýi múmkin ekenin eske salamyn.
Sonymen qatar, turmystyq órt qaýipsizdigi erejelerin saqtap, balalardy eresekterdiń qaraýynsyz qaldyrmaý qajet.
Qarapaıym erejelerdi saqtaý sizdiń jáne jaqyndaryńyzdyń ómiri men densaýlyǵyn saqtaýǵa múmkindik beredi.
Jańa jyl otbasylyq mereke ekenin eskere otyryp, ony úıde otbasymen qarsy alýdy usynamyn", - dep túıdi sózin Syrym Sháriphanov.