Tótenshe jaǵdaıdan zardap shekkenderge shyǵyndy óteý qaǵıdalary jarııalandy
Qazaqstan Respýblıkasy Úkimetiniń 2014 jylǵy 19 jeltoqsandaǵy №1358 qaýlysyna saı tótenshe jaǵdaılar saldarynan zardap shekkenderge keltirilgen zalaldy óteý algorıtmi bylaı:
1. Materıaldyq zalal keltirilgen zardap shegýshiler TJ týyndaǵan kúnnen bastap kúntizbelik 30 kún ishinde jergilikti atqarýshy organǵa (ákimdik) materıaldyq zalaldy óteý týraly ótinish beredi.
Jábirlenýshiniń óziniń ótinish jazýǵa múmkindigi bolmaǵan jaǵdaıda, onyń týystary nemese senimhat negizinde ózge de adamdar, sondaı-aq eger jábirlenýshi kámelettik jasqa tolmaǵan bolsa, zańdy ókilderi keltirilgen zııandy (zalaldy) óteý týraly ótinishpen júgine alady.
Keltirilgen zalaldy óteý týraly ótinishke: zardap shegýshi adamnyń jeke basyn kýálandyratyn qujattyń kóshirmesi; tabıǵı sıpattaǵy TJ týyndaǵan sátten bastap nemese TJ joıý kezeńinde zardap shekken adamnyń joǵalǵan jáne/nemese búlingen múlkiniń tizbesi qosa beriledi.
2.Ótinishter men qujattardy tirkeýdi ákimdik zardap shegýshige qujattardyń qabyldanǵanyn rastaıtyn qolhat bere otyryp, materıaldyq zalaldy óteý týraly ótinishterdi tirkeý jýrnalynda júrgizedi.
3.Materıaldyq zalaldy óteý týraly ótinish ákimdikke qujattar kelip túsken kúnnen bastap 15 jumys kúni ishinde qaralady.
4. Ákimdik ótinish tirkelgen kúnnen bastap 10 jumys kúni ishinde baǵalaýshyny tarta otyryp, keltirilgen zalaldyń mólsherin baǵalaýdy (ótinish berýshiniń múlkine qoljetimdilik bolýǵa tıis) uıymdastyrady. Jábirlenýshi baǵalaý júrgiziletin ýaqyt pen oryndy anyqtaıdy, keıin jábirlenýshi baǵalaý týraly eseppen tanysýǵa tıis.
5. Ákimdik baǵalaýshy qorytyndy shyǵarǵannan keıin 3 jumys kúni ishinde oblystyń, respýblıkalyq mańyzy bar qalanyń, astananyń, aýdannyń jáne oblystyq mańyzy bar qalanyń bıýdjetin atqarý jónindegi ýákiletti organmen kelisilgen qarajat bólý týraly sheshim qabyldaıdy.
6. Zardap shekkenderge tólem tıisti sheshim qabyldanǵannan keıin kúntizbelik 30 kún ishinde júzege asyrylady.
Múlikti tolyqqandy ári sapaly baǵalaý úshin sarapshylardyń jumysy sý tasqyny jaǵdaıy turaqtalyp, úıler men aýla aýmaqtarynan sý tolyǵymen tartylǵannan keıin bastalady.
Jergilikti atqarýshy organdarǵa qajet bolǵan jaǵdaıda ótinishterdi qabyldaý merzimin uzartý tapsyryldy.