Tótenshe jaǵdaıdan keıin kásip bastaıtyndarǵa tómen paıyzben nesıe beriledi

NUR-SULTAN. QazAqparat – Jańadan kásip bastaýshylarǵa jeńildetilgen nesıe eldegi Tótenshe jaǵdaı rejıminen keıin de beriledi. Bul týraly «Damý» kásipkerlikti damytý qory» AQ memlekettik organdar men ózara áreket etý departamentiniń dırektory Gúlsaıa Zaınelǵabdına aıtty, dep habarlaıdy QazAqparat tilshisi.

«Bizde jańa kásip bastaýshylarǵa arnalǵan baǵdarlamalar burynnan bar. Olar Tótenshe jaǵdaı aıasynda da jalǵasyn taba beredi. Jańa kásip bastaımyn deýshiler «Eńbek» baǵdarlamasy arqyly óz isin bastaı alady. Ol arqyly kásipkerlerge 6 paıyzdyq mólsherlememen nesıe alýyna múmkindik bar. Bul rette qaryz mólsheri – 6000 AEK-ten 8 000 AEK-ke deıin bolýy múmkin. Qaryz merzimi – 5 jyl. Odan bólek «Bıznestiń jol kartasy – 2025» baǵdarlamasy da baryn bilesizder. Onyń aıasynda da jańadan kásip bastaýǵa nıetti azamattardy qoldaımyz. Olarǵa sýbsıdııalaý, kepildendirý quraldaryn usynamyz. Bul rette jańadan kásip bastaǵan kásipkerler jumysyn aýyldarda nemese monoqalalarda bastasa – 750 mln teńgege deıin qaryz ala alady. Odan bólek olarda aınalym qarajat retinde 360 mln teńgege deıin nesıe alýyna múmkindik bar», - dedi Gúlsaıa Zaınelǵabdına OKQ-da onlaın rejımde ótken baspasóz máslıhatynda.

«Damý» qorynyń ókili kásipkerlerge kepildik quraly usynylatynyn da jetkizdi. ıAǵnı jańadan kásibin bastaǵan azamattar úshin kepildik mólsheri qaryz somasy 180 mln teńgeden aspaǵan jaǵdaıda 85 paıyzdyq deńgeıde bolatynyn jetkizdi.

«Al kásipker qalada jobasyn júzege asyryp jatsa, kepildik mólsheri 7 mlrd teńgege deıin ulǵaıyp otyr. Stavka – túpki qaryz alýshy úshin 6 paıyz. Qazir de «Damý» qoryna ótinim joldaı alasyzdar. Ótinimder Tótenshe jaǵdaı kezinde de, keıin de qaralady», - dedi ol.

Aıta ketsek, buǵan deıin QR UEM kásipkerlikti damytý departamentiniń dırektory Shyńǵys Ahmetov «Bıznestiń jol kartasy – 2025» baǵdarlamasy men «Qarapaıym zattar ekonomıkasy» baǵdarlamasy bıznes ıelerine memleket qandaı qoldaý sharalaryn kórsetetinin aıtyp bergen edi.