Tótenshe jaǵdaıda paıdaǵa kenelmek bolǵan kásipkerlerden 4 mln maska tárkilendi

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev tótenshe jaǵdaı kezinde eldegi zańdylyq pen tártip saqtaýdy qamtamasyz etý jumystary qalaı júrgizilip jatqany jóninde baıandady, dep habarlaıdy QazAqparat.

«Qazir barlyq óńirlerde prokýratýra, polıtsııa jáne memlekettik kirister komıtetiniń ókilderinen quralǵan mobıldi toptar jumys isteýde. Olar barlyq jerde medıtsınalyq maskalar men antıseptıkterdi ruqsatsyz, joǵary baǵada satý boıynsha derekterdi anyqtaýmen aınalysyp jatyr. Tótenshe jaǵdaı jarııalanǵaly beri Qylmystyq kodekstiń 215-baby boıynsha 15 tergeý amaly bastaldy», - dedi mınıstr Habar 24 arnasyndaǵy onlaın rejimdegi baspasóz máslıhatynda.

Dáýren Abaev mundaı jaǵdaılar elordada, Almatyda jáne Aqtóbe, Almaty, Qaraǵandy, Qostanaı, BQO-da anyqtalǵan.

«Elordada jáne Aqtóbe oblysynda maska men antıseptıkti zańsyz satqan 40 adam ákimshilik jaýapqa tartyldy. Osy ákimshilik jáne qylmystyq ister boıynsha 4 mln maska men 13 myń lıtr antıseptık tárkilendi. Olar densaýlyq saqtaý mekemelerine berilip jatyr», - dedi ol.