Tótenshe jaǵdaıda kómektesetin oqýshynyń mobıldik qosymshasy baıqaýda úzdik atandy

ASTANA. QazAqparat - «Ulttyq aqparattyq tehnologııalar» AQ «Shag» kompıýterlik akademııasymen birge «Ashyq úkimet» portalynyń ashyq derekteri negizinde jumys isteıtin mobıldik qosymshalar baıqaýyn ótkizdi, dep habarlaıdy QazAqparat.

Kompanııa baspasóz qyzmetiniń málimeti boıynsha, «Shag» kompıýterlik akademııasynyń shákirti 16 jastaǵy Davıd Knyshenkonyń «Fast Helper» jobasy baıqaýdyń jeńimpazy atanǵan. Bul mobıldik qosymsha tótenshe jaǵdaılarda qoldaný úshin jasalǵan. Onyń kómegimen órt sóndirý qyzmetin, jedel járdem nemese qutqarý qyzmetin shaqyrýǵa bolady. Sondaı-aq shaqyrylǵan qyzmettiń kelýin kútpeı-aq, ne isteý kerek jáne qalaı isteý kerek ekenin eske túsiretin aqparattyq anyqtama bólimi qarastyrylǵan.

Qazylar alqasy adamdardyń deni qaýip-qater kezinde ne isteý kerek ekenin bilmeı nemese biletinin eske túsire almaı qalǵan kezde qosymshanyń paıdaly ekendigin atap ótti.

Baıqaýǵa usynylǵan jobalar ıdeıanyń túpnusqalylyǵy, áleýmettik mańyzdylyǵy, qolaılylyǵy, kommertsııalaý bolashaǵy sekildi talaptar boıynsha baǵalady. Ekinshi jáne úshinshi orynǵa, adamdarǵa ózderine qolaıly mektepti, aýrýhanany, dárihanany tańdaýǵa múmkindik beretin, «Almaty q. oqý oryndary» mobıldik qosymshasy (S.Kajıev, V.Kadatskıh) jáne «HealthApp» (S.Alıhanova) web-qosymshasy jobalary ıe boldy.