Apatty kútpeı, onyń aldyn alý sharalaryn qabyldaýymyz kerek — Tursynbaev

<p>ASTANA. KAZINFORM — QR Tótenshe jaǵdaılar vıtse-mınıstri Kegen Tursynbaev Shyǵys Qazaqstan oblysyna jumys saparymen bardy. Bul týraly vedomstvonyń baspasóz qyzmeti málimdedi.</p>

Sapar aıasynda ol Óskemende ornalasqan QR TJM ekinshi qutqarý batalonynda bolyp, qutqarýshylar men áskerı qyzmetshilerdiń qyzmet ótkerý sharttarymen tanysty. Ol qutqarýshylar jumys isteıtin jabdyqtyń tehnıkalyq jaǵdaıyna da baǵa berip, jeke qurammen aǵymdaǵy mindetter men máseleler týraly sóılesti.

Sonymen qatar vıtse-mınıstr Shyǵys Qazaqstan oblysynyń Tótenshe jaǵdaılar departamentinde jumys keńesin ótkizdi. Іs-sharaǵa Shyǵys Qazaqstan oblysy ákiminiń orynbasary Baqytjan Baıahmetov qatysty. Kezdesý barysynda óńirdiń azamattyq qorǵaý qyzmetteriniń qysqy kezeńge daıyndyǵyna, jylytý maýsymynyń ótýine jáne seısmıkalyq qaýipsizdikti qamtamasyz etýge qatysty negizgi máseleler talqylandy. Sý tasqynynyń aldyn alýǵa jáne profılaktıkalyq is-sharalardy ýaqtyly iske asyrýǵa baǵyttalǵan sharalarǵa erekshe nazar aýdaryldy.

Foto: TJM baspasóz qyzmeti

Vıtse-mınıstr óńirdiń qaýipsizdik deńgeıin arttyrý úshin profılaktıkalyq sharalardy aldyn ala oryndaýdyń mańyzdylyǵyn aıtty.

«Aldyn alý is-sharalaryn aldyn ala iske asyrý tótenshe jaǵdaılardan qorǵalý deńgeıin arttyrýǵa múmkindik beredi. Biz apatty kútpeı, onyń aldyn alý úshin barlyq sharalardy qabyldaýymyz kerek. Azamattardyń qaýipsizdigi — bizdiń basty mindetimiz», — dep atap ótti Kegen Tursynbaev.

Jumys sapary barysynda vıtse-mınıstr kóktemgi sý tasqyny kezeńinde bolýy múmkin tótenshe jaǵdaılarǵa daıyndyǵyn baǵalaý úshin oblystyń sý tasqyny qaýpi bar aýdandaryna da barady.

Buǵan deıin TJM 4 ushaq pen 7 tikushaq satyp alatyny habarlandy.