Tótenshe jaǵdaı rejımin alyp tastaý qatelik boldy ma - Toǵjanovtyń jaýaby

NUR-SULTAN. QazAqparat – Buǵan deıingi qatań shekteý sharalaryn, sonymen birge tótenshe jaǵdaı rejımin alý qatelik boldy ma? Bul suraqqa qatysty búgin Ortalyq kommýnıkatsııalar qyzmetinde ótken baspasóz máslıhatynda Úkimet basshysynyń orynbasary Eraly Toǵjanov jaýap berdi, dep habarlaıdy QazAqparat tilshisi.

«Jalpy muny qatelik dep eseptemeımin. Qatań shekteý sharalaryn engizý, atap aıtqanda tótenshe jaǵdaı rejımi saıyp kelgende bastapqy kezeńde vırýstyń jappaı taralý qaýpin tejedi. Medıtsınalyq bazany daıarlaýǵa belgili bir ýaqyt kerek edi. Mine, basty máseleniń biri osy dep oılaımyn. Sonymen qatar, ol kezde halyq da daıyn emes edi. Halyqty belgili bir sanıtarlyq normalar men talaptarǵa úıretý kerek boldy. Memleket árdaıym tótenshe jaǵdaı rejıminde ómir súre almaıdy. Ekonomıka jumys istep turýy tıis. El azamattary eńbek etip, aılyq taba alýy kerek. Áý bastaǵy mindet – sanıtarlyq rejımdi kúsheıte otyryp, karantın talaptaryn kezeń-kezeńimen alý edi», - dedi Úkimet basshysynyń orynbasary.

Onyń aıtýynsha, buryn qoıylǵan bul talaptar kúshinde qalǵan.

«Tipti koronavırýstyń ekinshi tolqyny da kútilgen. Biz barlyq máselege daıyn bolýymyz kerek. QR Bas memlekettik sanıtarlyq dárigeri 20 kún buryn barlyq óńirge, naqty ákimderdiń bárine mindet júktedi. Aýrý jaǵdaıyna qaraı ár ákim naqty sharalardy qabyldaıdy», - dedi Eraly Toǵjanov.