Tótenshe jaǵdaı rejımi aıaqtalǵan soń da kommýnaldyq ótemaqy alýǵa bola ma

ALMATY. QazAqparat – Almatyda ótken onlaın-brıfıng barysynda qalalyq Energotıimdilik jáne ınfraqurylymdyq damý basqarmasynyń basshysy Áset Masabaev kommýnaldyq ótemaqy alý tártibin túsindirdi, dep habarlaıdy QazAqparat tilshisi.

Onyń aıtýynsha, arnaıy qurylǵan ortalyqtyń nómirine 158 myń adam habarlasqan.

«Sońǵy kúnderi turǵyndardan kóp suraq kelip jatyr. Kóp jaǵdaıda osy sanatta joq azamattar zvondaıdy. Bizge osy ýaqytqa deıin 158 myń adam habarlasqan. Osy azamattardyń 20449-ynyń sanaty rastalǵan. Qalǵany bul sanatqa kirmegen», - dedi Áset Masabaev.

Onyń aıtýynsha, tótenshe jaǵdaı aıaqtalsa da kommýnaldyq shyǵyndardyń ótemaqysy beriledi.

«Tótenshe jaǵdaı bitse de ótemaqy berile me, degen suraq kelip jatyr. Komıssııanyń sheshimine sáıkes kommýnaldyq shyǵyndar sáýir jáne mamyr aılaryna beriledi. Sáýirdiń ótemaqysy - mamyrda, mamyrdyń ótemaqysy - maýsymda beriledi», - dedi basqarma basshysy.

Onyń aıtýynsha, kommýnaldyq ótemaqy aqpan, naýryz aılarynda bereshegi bar tutynýshylarǵa da beriledi.

Munyń aldynda qalalyq ákimdik kommýnaldyq shyǵynnyń 15 myń teńge kólemindegi ótemaqysyn alatyn muqtaj otbasylardyń sanyn 2 esege arttyrǵanyn jazǵan bolatynbyz.