Tótenshe jaǵdaı kezinde áreket etetin qurylymdardy qarjylandyrýdyń mańyzy zor – Áshimbaev
Palata spıkeri jaýapty qurylymdar kúzde Qostanaı oblysynda bolǵan órtten sabaq almaǵanyna nazar aýdardy.
«Eger osyndaı alapat órtpen alǵash ret betpe-bet kelip tursaq, másele basqasha bolar edi. Biraq bizde mundaı oqıǵalar jyl saıyn qaıtalanyp otyr. Kúzde ǵana Qostanaı oblysynda úlken órt boldy. Saldarynan 40 myń gektarǵa jýyq jer órtenip ketti. Soǵan baılanysty Prezıdentimiz tıisti organdarǵa naqty mindetter júktedi. Ony oryndaý úshin Úkimet aýqymdy jumysty qolǵa aldyq dep esep te berdi. Biraq Abaı oblysyndaǵy oqıǵa búkil júıeniń ýaqtyly áreket etpegenin, tıisti qurylymdar arasynda úılesim men tártiptiń joq ekenin kórsetti», – dedi M. Áshimbaev.
Soǵan baılanysty Senat tóraǵasy qazir osy baǵytty túbegeıli ózgertetin ýaqyt kelgenin, bul baǵytta Memleket basshysynyń naqty tapsyrmalary bar ekenin jáne aldaǵy ýaqytta tıisti baǵdarlama men basqa da qajetti sharalar qabyldanatynyn tilge tıek etti. Bastalǵan tergeý jumystarynyń qorytyndysy boıynsha da birqatar is-shara iske asyrylatyny anyq.
«Biz osy máseleni kelesi jyldyń bıýdjetin qaraý kezinde de nazarda ustaımyz. Bul rette tótenshe jaǵdaılar kezinde áreket etetin qurylymdardy qarjylandyrýdyń mańyzy zor. Eń bastysy, bólingen qarajattyń maqsatqa saı, durys jumsalýyn baqylaýymyz kerek. Eger biz osy baǵdarlamany qabyldap, kúzde oǵan mıllıardtaǵan qarjy bólsek, biraq kelesi jyly osyndaı oqıǵa taǵy qaıtalanyp jatsa, onda oǵan bárimiz jaýapty bolamyz. Sondyqtan senatorlar bul másele únemi óz baqylaýynda ustaıdy», – dedi Senat spıkeri.
Aıta keteıik, búgin Senat otyrysynda palata depýtattary Úkimettiń jáne Joǵary aýdıtorlyq palatanyń 2022 jylǵy respýblıkalyq bıýdjettiń atqarylýy týraly esepterin qarady.