Tótenshe jaǵdaı kezinde alaıaqtar qoldanatyn 5 tásil

NUR-SULTAN. QazAqparat – Koronavırýstyń taralý qaýpin azaıtý maqsatynda kóptegen bankter men kompanııalar qashyqtan jumys isteý rejımine kóshti. Qazaqstandyqtar kóp jaǵdaıda onlaın-tólemder jasaýda. Mundaı jaǵdaıdy qarjylyq alaıaqtar paıdalanýy múmkin. Bul týraly QazAqparat QR Qarjy naryǵyn retteý jáne damytý agenttigine baspasóz qyzmetine silteme jasap habarlaıdy.

Agenttiktiń habarlaýynsha, alaıaqtar bankter men kompanııalardyń qashyqtyqtan jumys isteýin paıdalanyp, halyqtan qarajatty tartyp alýǵa baǵyttalǵan túrli alaıaqtyq áreketterdi ázirlep, iske asyrýy múmkin.

1-tásil: Dári-dármek satatyn jalǵan saıt ashý

Alaıaqtar qoldanatyn tásilderdiń biri – medıtsınalyq maskalar men dári-dármekter satatyn bankterdiń, uıymdardyń, ınternet-dúkender men dárihanalardyń fıshıng saıttaryn (ınternet-alaıaqtyqtyń bir túri – avtor) jasaýǵa baılanysty bolýy múmkin. Paıdalanýshylarǵa olardyń tólem kartalary týraly derekterdi engizý usynylady. Olaı etken jaǵdaıda kartadaǵy aqshadan aıyrylyp qalasyz, ıaǵnı sizge jetkizilmeıtin taýar úshin aqsha tóleısiz.

2-tásil: Qarjy uıymynyń qyzmetkeri retinde habarlasý

Alaıaqtar ózderin qarjy uıymynyń qyzmetkerimiz dep tanystyra otyryp, azamattarǵa alyp-satarlyq maqsatta valıýta satyp alý úshin tómen paıyzdyq mólsherlememen iri somaǵa kepilsiz kredıtter resimdeýdi usynady. Sondaı-aq, tótenshe jaǵdaılar men karantın ýaqytynda ósimpuldar bolmaıtyny týraly ýáde beredi.

3-tásil: Jarnama naýqany qosylǵany týraly aqparat taratý

Alaıaqtar salymdar boıynsha joǵary paıyzdar bolatyny týraly ýáde bere otyryp, áleýmettik jelilerde nemese WhatsApp-ta jarnama naýqany iske qosylǵany týraly aqparat taratýy múmkin. Óz aqshańyzdy kúmándi uıymdarǵa senip tapsyrýdyń qajeti joq.

4-tásil: Koronavırýsqa qatysty qaıyrymdylyq jasaýdy usyný

Keıbir elderde alaıaqtar koronavırýs jóninde aqparat jazylǵan elektrondyq hattar taratady. Onda derbes derekterdi engizý nemese bank operatsııalaryn júrgizý qajet bolatyn ártúrli siltemeler kórsetiledi. Osylaısha, alaıaqtar paıdalanýshylardyń jeke tólem derekterin alý úshin ártúrli usynys aıtady. Mysaly, kıberqylmyskerler paıdalanýshylarǵa ınfektsııamen kúresý úshin qaıyrymdylyq jasaýdy usynady jáne Dúnıejúzilik densaýlyq saqtaý uıymynyń hatyn jiberip, tólem kartalary týraly derekterdi alady.

5-tásil Onlaın tólem arqyly medıtsınalyq qyzmetter usyný

Vıshıng-alaıaqtar ártúrli qýlyqqa barady. Mysaly, aýyryp qalǵan týysqandardyń sengishtigin paıdalana otyryp, onlaın-tólem arqyly túrli medıtsınalyq qyzmetterge aqy tóleýdi usynýy múmkin. Bul úshin olar telefon arqyly aqshany esepten shyǵarý úshin JSN, kartańyzdyń derekterin, SMS-habarlama arqyly kelgen kodty suraıdy.

Qarjylyq qyzmetterdi júzege asyrý kezinde tutynýshylardyń quqyqtary buzylǵan jaǵdaıda Agenttikke qashyqtan: poshta nemese kýrer arqyly jetkiziletin jazbasha ótinish arqyly, onyń ishinde Óńirlik ókilder basqarmasyna júgine alady. Mundaı áreket qaýipsizdikti qamtamasyz etý jáne COVID-19 taralýyna jol bermeý maqsatynda oryndalady.