Tótenshe jaǵdaı: Elordada bazarlar men dúkenderdiń jumys kestesi belgilendi

NUR-SULTAN. QazAqparat - Nur-Sultanda tótenshe jaǵdaı aıasynda bıznes sýbektileriniń, onyń ishinde saýda nysandarynyń, bazarlardyń, dúkender men dárihanalardyń jumys isteý tártibi bekitildi, dep habarlaıdy elorda ákimdiginiń resmı saıty.

Bıznes sýbektileri, onyń ishinde saýda nysandary men bazarlar, dúkender, dárihanalardyń TJ rejımi kezinde jumys kestesi saǵat 8.00-den 22.00-ge deıin.

Bıznes sýbektileriniń basshylary tonaýshylyq, taýarlardy urlaý jáne múlikti búldirý jaǵdaılaryn boldyrmaý úshin múmkindiginshe qosymsha qaýipsizdik sharalaryn qoldanǵany jón.

Sonymen qatar, úsh aýysymdy jumys kestesi bar uıymdar men áleýmettik mańyzy bar azyq-túlik taýarlaryn tasymaldaýshylardan basqa, komendanttyq saǵat bastalǵanǵa deıin azyq-túlik jáne azyq-túlik emes taýarlardy, shıkizatty, materıaldardy jumys kestesine sáıkes úzdiksiz jetkizýdi uıymdastyrý qajet.

Komendanttyq saǵat kezinde qyzmeti ruqsat etilgen uıymdardyń kólik quraldarynyń júrip-turýy úshin ózimen birge mynadaı qujattary bolýy qajet:

- jeke kýálik nemese pasport (júrgizýshi jáne qyzmetkerler);

- avtokólik quralyna arnaıy ruqsattama;

- taýarlarǵa qatysty: shyǵý núktesin jáne túpnusqadaǵy jetkizý mekenjaıyn rastaıtyn taýar júkqujaty;

- qyzmetkerlerdi úsh aýysymdyq jumys kestesimen tasymaldaý barysynda – tótenshe jaǵdaı kezinde jumys ornyn rastaıtyn qujat (jumys ornynan anyqtama jáne t.b.) túpnusqada;

Aıta ketý kerek, jumys ornyn rastaıtyn qujatta kórsetilgen jetkizý mekenjaıy men uıymy sáıkes kelýi kerek.

Úsh aýysymdy jumys kestesi bar bıznes sýbektileri qyzmetkerlerdi turaqty bekitilgen kólik quralymen ortalyqtandyrylǵan tasymaldaýdy qamtamasyz etýi kerek.