Tótenshe jaǵdaı: Eldegi 20 áýejaıdyń 18-i shtattyq rejımde jumys istep tur

NUR-SULTAN. QazAqparat – QR Indýstrııa jáne ınfraqurylymdyq damý mınıstri Qaıyrbek Óskenbaev Tótenshe jaǵdaı kezindegi eldiń kólik ınfraqurylymy qalaı jumys istep turǵanyn baıandady, dep habarlady QazAqparat tilshisi.

«Barlyq aımaqtarda qalalyq avtobýs qyzmeti, barlyq temirjol vokzaldary jáne barlyq jolaýshylar men júk poıyzdarynyń qozǵalysy tolyǵymen qalpyna keltirildi.

Respýblıkalyq mańyzy bar avtojoldar boıynsha avtokólik quraldary úshin qozǵalysqa shekteý joq», - dedi vedomstvo basshysy Úkimet otyrysynda.

Qaıyrbek Óskenbaevtyń aıtýyna qaraǵanda, Almaty qalasynyń áýejaıy qyzmetin qaıta bastaýǵa tehnıkalyq daıyn.

«Elimizdiń 20 áýejaıynyń 18-i shtattyq rejımde jumys isteıdi. Almaty jáne Taldyqorǵan áýejaılarynyń qyzmeti toqtatyldy. Bul rette, Almaty qalasynyń áýejaıy qyzmetin qaıta bastaýǵa tehnıkalyq daıyn, quzyretti arnaıy organdardyń tıisti sheshimi qajet», - dedi mınıstr.