Tótenshe jaǵdaı dabyly nege «prezıdenttik» dep ataldy – Almaty ákimdigi jaýap berdi

<p>ALMATY. KAZINFORM - Almatyda Mass Alert tótenshe jaǵdaı&nbsp; týraly qulaqtandyrý júıesi sátti synaldy.</p>

Qala ákimdigi qulaqtandyrý júıesin tekserý týraly habarlamalar «Prezıdenttik qulaqtandyrý» nemese «Ulttyq qulaqtandyrý» belgisimen kelgenin atap ótti.

«Bul 3GPP TS 23.041 halyqaralyq spetsıfıkatsııasy Cell Broadcast arnasynyń taqyryp ataýlaryn standarttaýmen baılanysty, osy spetsıfıkatsııaǵa sáıkes barlyq telefon apparattyn óndirýshiler ózderiniń mobıldi qurylǵysynda osy ataýlardy operatsııalyq júıe deńgeıinde júzege asyrady. Halyqaralyq spetsıfıkatsııada qabyldanǵan taqyryptardyń ataýy ózgermeıdi», - dep habarlady ákimdikten.

Osyǵan baılanysty 4370 arnasynda «Prezıdenttik qulaqtandyrý» jáne «Ulttyq qulaqtandyrý» degen ataýmen habar taratyldy.

«Qazir «Ulttyq qulaqtandyrý» degen ataýmen ázirleýshiler úshin Qazaqstan Respýblıkasyna arnalǵan talaptar ázirlenip jatyr», - dep habarlady ákimdikten.

Eske salaıyq, búgin saǵat 12:00-de Android operatsııalyq júıesi bar mobıldi qurylǵylardy paıdalanýshylar qazaq, orys jáne aǵylshyn tilinde habarlama aldy. 

Almaty ákimdigi atap ótkendeı, Mass Alert júıesiniń SMS-ke qaraǵanda birqatar artyqshylyǵy bar. Habarlama mobıldi operator jelisine qosylǵan, sondaı-aq jeke tańdalǵan geografııalyq aımaqtaǵy barlyq abonentke keledi. Sonymen qatar júıe jelilerdiń shamadan tys júktelý jaǵdaıynda jumys isteıdi.

Cell Broadcast tehnologııasynyń basty artyqshylyǵy — qamtý aımaǵyndaǵy barlyq abonentti birden ári jappaı eskertedi.