Tótenshe jaǵdaı: baqylaý posttarynda 9 889 avtokólik tekserilip, 1 768 buzýshylyq anyqtalǵan

NUR-SULTAN. QazAqparat - Kóliktik baqylaý organdarynyń qyzmetkerleri respýblıka avtojoldaryndaǵy 30 kóliktik baqylaý beketinde, Eýrazııalyq ekonomıkalyq odaqtyń (EAEO) syrtqy shekarasyndaǵy avtomobıl ótkizý pýnktteri men Reseımen ótkizý pýnktteri janynda, sondaı-aq karantındik aımaqtardyń baqylaý beketterinde táýlik boıy baqylaý júrgizýde, dep habarlaıdy QazAqparat QR IIDM Kólik komıtetiniń baspasóz qyzmetine silteme jasap.

Osy maqsatta beketterdiń qyzmetkerleri qajetti jeke qorǵanys quraldarymen jáne zalalsyzdandyrý quraldarymen qamtamasyz etildi.

Tótenshe jaǵdaı bastalǵannan 28 sáýirge deıin beketterde 9 889 avtokólik tekserilip, 1 768 buzýshylyq anyqtaldy, 3 327 qazaqstandyq ruqsat blankisi men EAEO syrtqy shekarasynan kelip túsken 952 habarlama rásimdelgen, sondaı-aq 54 mln teńgeden astam aıyppul jáne 16 mln teńgeden astam somada alymdar óteldi.

Budan basqa, Komıtettiń Ahýaldyq ortalyǵynyń kezekshileri kóliktik baqylaý beketteriniń jumysyna táýlik boıy monıtorıng júrgizýde. Onyń ishinde kólik-kommýnıkatsııalyq keshendegi shtattan tys jaǵdaılar men qaýipti óndiristik obektilerdegi apattar týraly 122 jedel habarlandyrý boıynsha aqparat usynylǵan (avtomobıl kóligi salasynda - 27, temir jol kóliginde - 95).

Sondaı-aq, QR Qarjy mınıstrliginiń Memlekettik kirister komıteti men QR UQK Shekara qyzmetiniń derekteri boıynsha avtokólik quraldaryn jáne jeke tulǵalardy memlekettik shekara arqyly ótkizý boıynsha kúndelikti taldaý júrgizilýde. Onyń qorytyndysy boıynsha 850-den astam avtokóliktiń tranzıttik qatynasta júkterdi halyqaralyq tasymaldaǵany belgili boldy.

Sonymen qatar, tótenshe jaǵdaı kezinde karantındik shekteýlerge baılanysty Kólik komıteti aǵymdaǵy jyldyń 15 sáýirinen bastap júkterdi avtokólikpen tasymaldaýǵa arnalǵan qaǵaz ruqsat berý qujattaryn elektrondyq formatqa aýystyrdy. Bul sharalar jylyna 65 myńnan astam A4 formattaǵy qaǵazdy únemdeýge múmkindik beredi.

Qazirgi ýaqytta kóliktik baqylaý beketterinde elektrondy arnaıy ruqsat qujattaryn tekserý kóliktik derekter bazasynyń aqparattyq-taldaý júıesiniń kómegimen júzege asyrylady.