Tótenshe jaǵdaı: Aqmola oblysynda azyq-túlik jetkizýde esh kedergi joq
Basqarma basshysynyń aıtýynsha, óńirde shaǵyn jáne orta kásipkerlik nysandary óńirde engizilgen tótenshe jaǵdaılar talaptaryna sáıkes shtattyq rejımde jumys isteýde. Osy rette, áleýmettik azyq-túlik taýarlarymen qamtamasyz etýge basa mán berilýde. Bul jaǵynan alǵanda qazirgi kezde eshqandaı másele týyndap otyrǵan joq.
«Kókshetaý qalasynda azyq-túlik qory jetkilikti, qazirgi kezde ol tolyqtyrylýda. «Kókshe» áleýmettik pavılony jáne «Qamqor» kommýnaldyq bazary jumys isteýde. Onda sıyr, eti, un, qant, jarma, kúrish, qyryqqabat, markop, kartop, 1-shi sortty jumyrtqa, kúnbaǵys maıy, maılylyǵy 2 paıyz sút, irimshik tárizdi áleýmettik mańyzy zor 19 túrli azyq-túlik taýarlaryna qol jetimdi. Kún saıyn qaladaǵy iri saýda úıleri men jelilerine monıtorıng júrgizilip otyrady», - dedi Erbol Ospanov.
Sonymen birge ol Kókshetaý qalasynyń perımetri boıynsha ornalasqan blokpostardan azyq-túlik tasymaldaıtyn kólikterdiń kedergisiz júrip-turýy qamtamasyz etilgenin atap ótti.
«Bizdiń oblystyq kásipkerlik jáne ónerkásip basqarmasy men «Atameken» ulttyq kásipkerlik palatasy birlesip, Kókshetaý qalasynyń perımetri boıynsha ornalasqan blokpostardan azyq-túlik jáne ózge de qajetti taýarlardy tasmaldaıtyn kólikterdiń kedergisiz ótýin qamtamasyz etý úshin olardyń tizimin jedel shtabqa joldap otyramyz. Tótenshe jaǵdaı jarııalanǵan alǵashqy kúni ınternettiń bolmaýyna baılanysty ekinshi deńgeıli bankter ınternet baılanysynyń turaqsyzdyǵynan jumysyn toqtatty, bul bankomattar júıesine de áser etti. Mereke kúnderi qarasańynda turǵyndar bankomattardan qol aqsha alýda qıyndyqtarǵa uryndy. Bul táýlik boıy qol jetimsiz bolyp otyr. Kóptegen dúkender men saýda úılerinde azyq-túlik qolma-qol aqshaǵa satyldy. Keshegi kúni tańerteń keıbir bankter bankomattaryna aqsha sala bastady. Bul turǵyndardyń qajetti azyq-túlikti satyp alýyna múmkindik berdi. Internetti qosa, bank kartochkalary arqyly saýda qaıta jandanatyn bolady. Ázirge Aqmola oblysynda azyq-túliktiń jetkizilýi men ony satýda esh kedergi joq», - dep túıindedi Erbol Ospanov.