Total prezıdentiniń qazasy kontsernniń Qashaǵanǵa qarym-qatynasyn ózgertpeıdi - U.Qarabalın

ASTANA. QazAqparat - Total prezıdentiniń qazasy kontsernniń Qashaǵanǵa qarym-qatynasyn ózgertpeıdi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Energetıka birinshi vıtse-mınıstri Uzaqbaı Qarabalın málim etti.

«Qashaǵan jobasynda Total kontserni de jumys isteýde. Bul - joǵary deńgeıde uıymdastyrylǵan álemdik deńgeıdegi kompanııa. Menińshe, bul kompanııanyń menedjmentinde «týdy kóterip», odan ary jyljýǵa qabiletti adamdar bar. Total-dyń basty jelisi osynaý qaıǵyly jaıtqa baılanysty Qashaǵan jobasyna qatysty qarym-qatynasyn ózgertpeıdi dep oılaımyn», - dedi ol.

Esterińizge sala keteıik, Frantsııanyń Total energetıkalyq kompanııasynyń Prezıdenti Krıstof de Marjerı (Christophe de Margerie) Máskeýdegi «Vnýkovo» áýejaıynda apatqa ushyraǵan Falcon-50 ushaǵynda qaza tapty. «Falcon» jeke ushaǵy qar jınaýshy kólikke soǵylǵan edi.