Tórtinshi synyptaǵy nemis balalarynyń 25 paıyzy oqı almaıdy nemese oqyǵanyn túsinbeıdi
Iglu (Internationale Grundschul-Lese-Untersuchung) halyqaralyq jobasynyń zertteýshileri nemis mektepterindegi bastaýysh synyp oqýshylary jıyrma jyl burynǵydan áldeqaıda nashar oqıtynyn anyqtady.
Seısenbi kúni jarııalanǵan zertteýde nemis mektepterindegi tórtinshi synyp oqýshylarynyń 25 paıyzy (ıaǵnı tórtten biri) oqyǵan mátininiń maǵynasyn jete túsinbeıtini aıtylǵan.
2001 jyly mundaı balalardyń úlesi 17 paıyz bolǵan edi.
Oǵan sebep bolǵan jaǵdaıdyń biri - mektepterdi belgili bir kezeńge jaýyp tastaǵan koronavırýs pandemııasy bolýy múmkin. Alaıda, zertteýshilerdiń pikirinshe, bárine tek qana pandemııa kináli deýge negiz joq.
«Oqý úlgeriminiń tómendeý tendentsııasy 2006 jyldan bastap baıqalǵan. Árıne, pandemııa kezinde bul úrdis qarqyn alyp, bizdiń bilim berý salasyndaǵy problemalar kúrdelene túskenin moıyndaý kerek», - deıdi Dortmýnd tehnıkalyq ýnıversıtetiniń ǵalymy Nele MakIlvanı.
Oqý úlgerimi nasharlaǵanymen, balalar sabaqtan qalmaıdy, olar mektepke barǵandy jaqsy kóredi
Zertteýge sensek, tabysy tómen nemese úıinde nemis tilinde sóılemeıtin otbasy balalary nemis tilinde sóıleıtin aýqatty otbasyndaǵy qurdastarymen salystyrǵanda nashar oqıdy eken.
Statıstıkadaǵy birden-bir qýantatyn jańalyq – balalardyń 85 paıyzdan astamy bastaýysh mektepti jaqsy kóredi jáne sabaqqa qulshyna barady.
2001 jyly mundaı balalar sany az boldy - shamamen 79 paıyz.
Sarapshylar jaǵdaıdy ózgertý úshin Germanııa bıligin dereý áreket etýge shaqyrdy.
1955 jyldan beri Germanııanyń jetekshi uıymy sanalatyn Arbeitskreis für Jugendliteratur uıymynyń tóraǵasy Ralf Shvaıkarttyń aıtýynsha, bılik oqýdy damytýdyń naqty, tıimdi jáne burynnan qalyptasqan sharalaryn maqsatty túrde qolǵa alyp, osy baǵytqa ınvestıtsııa salýy kerek.