Tórtinshi synyp oqýshysy Kókshetaý kósheleriniń tarıhyn zertteýge kómektesetin oıyn oılap tapty
Kókshetaý qalasynyń fızıka-matematıka baǵytyndaǵy Nazarbaev zııatkerlik mektebiniń baspasóz qyzmetiniń málimetinshe, «Týǵan elge taǵzym – 2021» ólketaný-zertteý ekspedıtsııasyna qatysýshylardyń qashyqtan Jelilik jobalar men shyǵarmashylyq jumystar baıqaýynyń jabylý rásimi ótti.
«Elimizdiń Nazarbaev zııatkerlik mektepteri arasynda «Týǵan elge taǵzym» jobasynyń qorytyndysy shyǵaryldy. Bul ǵylymı-ólketaný ekspedıtsııasy – «Nazarbaev zııatkerlik mektebi» derbes bilim berý uıymynyń ulttyq tarıh pen mádenıetti zerdeleýge baǵyttalǵan iri jobalarynyń biri. Ol oqýshylardyń týǵan eline degen qyzyǵýshylyǵyn qalyptastyrýǵa, patrıotızm sezimin kúsheıtýge baǵyttalǵan. Bilim berý saparlarynyń ereksheligi Nazarbaev zııatkerlik mektepteri arasynda Qazaqstannyń óńirleri boıynsha zertteý júrgizý jáne tanysý úshin baǵdarlarmen almasý bolyp tabylady», - dep atap ótti vedomstvodan.
Baıqaý qorytyndysy boıynsha Kókshetaý qalasynyń fızıka-matematıka baǵytyndaǵy Nazarbaev zııatkerlik mektebiniń tórtinshi synyp oqýshysy Aılana Ómirzaq «Kókshetaý qalasynyń kósheleri» jobasymen «Uly Dala órkenıeti» atalymy boıynsha 1 oryn aldy. Aılananyń jobasy usynylǵan 35 jobanyń ishinde úzdik dep tanyldy.
«Men qalamyzdyń kóshelerin arnaıy toptarǵa bólip, oqýshylar arasynda saýalnama júrgizdim. Nátıjesinde kópshiliginiń kóshelerdiń shyǵý tarıhyn bilmeıtinin kórdim. Bul máseleni sheshý úshin men oıyn oılap taptym. Bul oıyn úsh bólimnen turady Zerek, Emtıhan jáne Bilim. Oıynnyń birinshi bóliminde balalar bizdiń tarıhymyzben eskertkishter arqyly tanysa alady. Ekinshide suraqtarǵa jaýap berý kerek. Úshinshi bólimde balalar bir áripti tańdap, osy áripten bastalatyn kósheni tabýy kerek», - dep bólistiAılana.
Aldaǵy ýaqytta ol oıynǵa patent alýdy josparlap otyr. Oqýshynyń ózi aıtqandaı, jasalǵan jumys bizdiń elimizdiń tarıhyn zertteýdegi alǵashqy qadamy.