Tórtinshi munaı óńdeý zaýytynan ne úshin bas tarttyq? - «QazMunaıGaz»

ASTANA. QazAqparat - Búgin Májilistegi «Nur Otan» partııasy fraktsııasynyń otyrysynda «QazMunaıGaz» Ulttyq kompanııasy» AQ basqarma basshysynyń orynbasary Danııar Tıesov tórtinshi munaı óńdeý zaýytyn salýdan bas tartý sebebin túsindirdi.

Eske sala keteıik, Memleket basshysy N.Nazarbaev bıyl Úkimetke elimizde tórtinshi munaı óńdeý zaýytyn salý máselesin qarastyrýdy tapsyrǵan bolatyn. Alaıda keıinnen múddeli mınıstrlikter men ulttyq kompanııalar tórtinshi munaı óńdeý zaýytyn salýdyń ornyna Shymkenttegi zaýyttyń qýatyn arttyrýdy usyndy.

«Nege biz tórtinshi MÓZ salýdy emes, Shymkenttegi zaýyttyń qýatyn arttyrýdy jón sanap otyrmyz? Másele mynada: elimizdegi munaı ónimderiniń jalpy balansy aýrýhanadaǵy ortasha temperatýra ispettes. Al munaı ónimderin tutynýdy tutastaı arttyrý birqalypty bolmaıdy, ári bul eldegi qalyptasqan demografııalyq ahýalmen tyǵyz baılanysty», - dedi Danııar Tıesov.

Bul rette «QazMunaıGaz» kompanııasynyń ókili qazaqstandyq munaı ónimderin ótkizýdiń eki jolyn atap ótti, onyń birinshisi - ishki naryq, ekinshisi - eksporttyq áleýet. Al Danııar Tıesovtyń sózine qaraǵanda, elimizdiń ońtústik óńirinde suranys jyl saıyn artyp otyr.

«Eger eksport máselesine kelsek, onda ashyǵyn aıtaıyq, biz Reseıge de, Qytaıǵa da ondaı múmkindik ala almaımyz. Batystaǵy Ázerbaıjan men Iranda da munaı ónimderi ózderinde jetkilikti. Endeshe, eksporttyq áleýeti zor bir ǵana jol - bul Ortalyq Azııa elderi, ol óńirde munaı ónimderi de jetkiliksiz, halyq ósimi de zor», - dedi D.Tıesov.