Tórt jylda kommýnaldy tólem boıynsha 5 mlrd teńgege kómek kórsetilgen – Úkimet

ASTANA. QazAqparat – Jyl basynan beri 31 myń otbasyna kommýnaldyq tólemder boıynsha 630 mln teńgege kómek kórsetildi. Bul týraly QR ındýstrııa jáne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.

«Jańa tarıftik saıasat kommýnaldyq qyzmetterge tarıfti orta eseppen 20%-ǵa deıin arttyrýdy kózdeıdi. Jalǵyz baspanasy bar nemese memlekettik turǵyn úı qoryndaǵy páterde turatyn az qamtylǵan azamattardy qoldaý maqsatynda jergilikti bıýdjetten kommýnaldyq qyzmetterge jumsalǵan shyǵystardy óteý úshin kómek kórsetiledi. Bul kómekti taǵaıyndaýdyń jalpy erejeleri Úkimet deńgeıinde aıqyndalady. Jergilikti máslıhattar azamattardyń shekti jol beriletin shyǵystar úlesin jáne turǵyn úı kómegin taǵaıyndaý tártibin bekitedi», - dep túsindirdi mınıstr Úkimettiń búgingi otyrysynda.

Sońǵy 4 jylda ákimdikter dereginshe, turǵyn úı kómegi jalpy 5 mlrd teńgege 174 myńnan astam abonentke tólengen.

Bıylǵy 6 aıda 630,5 mln teńgege 31 myń otbasyna turǵyn úı kómegi kórsetildi.

«Atalǵan kómekti alýshylar kólemin jáne ótemaqy somasyn ulǵaıtý maqsatynda qaǵıdalarǵa 2022 jyldyń jeltoqsanynda shekti jol beriletin shyǵystar úlesin 10%-dan aspaıtyn mólsherde shekteý sııaqty ózgerister engizildi. Osy baǵyttaǵy jumys jalǵasady», - dedi Marat Qarabaev.

Aıta keteıik, bıyl turǵyndar úshin tarıf 10%-ten 30%-ke deıin ósedi.

Kommýnaldyq tólemder tabysynyń 10%-nen asyp ketken turǵyndar memleket kómegin ala alady.

Sondaı-aq, Ulttyq ekonomıka mınıstri Álibek Qýantyrov «Tarıfti ınvestıtsııaǵa aıyrbastaý» baǵdarlamasy qalaı júrgiziletinin túsindirgen edi.