Tórt jylda dopıng qoldanǵan 124 qazaqstandyq sporttan shettetildi

ASTANA. QazAqparat – 2016-2020 jyldar aralyǵynda dopıng úshin 124 qazaqstandyq sporttan shettetildi. Bul týraly Mádenıet jáne sport mınıstrligi jarııalaǵan retteýshilik saıasattyń konsýltatıvtik qujatynda jazylǵan, dep habarlaıdy QazAqparat tilshisi.

«Dopıngke qarsy erejelerdi buzǵany úshin 2016 jyly 14 sportshy 2 jyldan 4 jylǵa deıin, 2017 jyly 15 sportshy (onyń ishinde 1 ómir boıyna) jáne 1 jattyqtyrýshy, 2018 jyly 37 sportshy, 2019 jyly 44 sportshy, 2020 jyly 14 sportshy jarystan shettetildi. Dıskvalıfıkatsııa kezeńinde sportshy men jattyqtyrýshyǵa sporttyq is-sharalarǵa jáne sporttyq is-sharalar sheńberindegi oqý-jattyǵý protsesine qatysýǵa ruqsat etilmeıdi», - dep dopıng úshin sporttan shettetilgender sany kórsetilgen qujatta.

Osyǵan baılanysty mınıstrlik Eńbek kodeksine dıskvalıfıkatsııa ýaqytynda sportshy men jattyqtyrýshyny shattaǵy qyzmetkerler qatarynan shyǵarý normasyn engizýdi usynyp otyr.

«Qazirgi ýaqytta qurama komandanyń múshesi eńbek sharty negizinde shtattaǵy qyzmetker sanalady. Bul rette QR Eńbek kodeksinde sporttyq qyzmettiń ereksheligin eskere otyryp, ony buzǵan jaǵdaıdaǵy negizder kózdelmegen. Atap aıtqanda, ómir boıyna nemese 6 aı ıa bolmasa odan da kóp merzimge sporttan shettetý kezinde sportshy men jattyqtyrýshy da jumys istemeıtini belgili. Alaıda Eńbek kodeksine sáıkes, atalǵan negizder eńbek shartyn buzý úshin negiz bolyp tabylmaıdy», - dep usynys jazylǵan konsýltatıvtik qujatta.

Buǵan qosa, tıisti qujatta 2000-2021 jyldar aralyǵynda Olımpıada oıyndarynda ulttyq qurama sportshylary jeńip alǵan lıtsenzııa sany 111-den 98-ge deıin qysqarǵany jáne oǵan qandaı faktorlar sebep bolǵany jazylǵan.