Tórt jolaqty Atyraý-Dossor avtojoly qashan salynady

NUR-SULTAN. QazAqparat – 2025 jyly 4 jolaqty Atyraý-Dossor avtojolynyń qurylysy bastalady. Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken elimizdiń batys óńirindegi avtojoldardy salýǵa qatysty qoǵamdyq talqylaý barysynda senator Saǵyndyq Luqpanov Atyraý-Dossor avtojoly qashan jóndeletindigin suraǵan edi.

«Bul jol ýchaskesi 2009 jyly III tehnıkalyq sanat ólshemderine saı qaıta salyndy. Ol kezde Atyraý men búkil óńir úshin joldyń mańyzdylyǵy eskerilmegen. Ýchaskedegi qozǵalys qarqyny ulǵaıǵanyn eskere otyryp jáne «Qýatty óńirler: el damýynyń draıveri« ulttyq jobasyna sáıkes 2023 jyly І tehnıkalyq sanatqa aýystyrý boıynsha jobalyq-smetalyq qujattamasyn ázirleý kózdelgen. 2025 jyldan bastap qaıta qurýdy bastaýdy tapsyrdym», - dedi mınıstr.

Sondaı-aq, ol atalǵan ýchaskeni iske asyrý QR Úkimeti bekitken Atyraý oblysyn damytýdyń keshendi josparynda qamtylǵanyn atap ótti.

Budan buryn habarlanǵandaı, QR IIDM el úshin mańyzdy máselelerdi ashyq qoǵamdyq talqylaýdy bastady.

Búgin mınıstrlik elimizdiń batys óńirindegi avtomobıl joldaryn salý jáne rekonstrýktsııalaý taqyryby boıynsha alǵash ret kezdesý ótkizdi.

Іs-sharaǵa mınıstr Qaıyrbek Óskenbaev, Avtomobıl joldary, Qurylys jáne turǵyn úı kommýnaldyq sharýashylyq isteri komıtetteriniń, «QazAvtoJol» ulttyq kompanııasynyń basshylary, QR Parlamenti Senaty men Májilisiniń depýtattary, jýrnalıster, blogerler jáne qoǵam qaıratkerleri qatysty.

Sondaı-aq óńir turǵyndary Zoom boıynsha talqylaýǵa qosyldy.