Tórt jolaqty jol kóbeıse, tehnıkany da kóbeıtý kerek – mınıstr Qarabaev
Mınıstrdiń aıtýynsha, qazirgi ýaqytta «QazAvtoJol» ulttyq kompanııasynyń barlyq kúshi joldardy qys mezgiline daıyndaýǵa baǵyttalǵan. Joldardy qysta kútip ustaý úshin 142 myń tekshe metr qum jáne 25 myń tonna tehnıkalyq tuz ázirlengen.
«Ulttyq operator 1 870 qysqy tehnıkany jumyldyrdy, onyń ishinde 493-in merdiger uıymdar daıyndasa, 218-i jalǵa alyndy. Sońǵy jyldary 4 jolaqty joldar kóbeıýde, bul óz kezeginde jol-paıdalaný tehnıkasynyń sanyn arttyrýdy talap etedi. Osy qajettilikti sheshý úshin «QazAvtoJol» bıyl qosymsha 379 tehnıka satyp alýda, onyń 245-i ónerkásipti damytý qory arqyly, 25-i jol júrý aqysynan jáne 109-y – amortızatsııalyq aýdarymdar esebinen alynady», – dedi Marat Qarabaev Úkimettiń búgingi otyrysynda.
Degenmen, áli de 1 100-den astam tehnıka jetispeıdi. Sondyqtan Kólik mınıstri Ónerkásipti damytý qorynan jeńildetilgen nesıe alý arqyly tehnıkalardy tolyqtyrý jumystary jalǵasatynyn jetkizdi.
Aıta keteıik, bıyl Qazaqstan boıynsha 10 700 shaqyrym jolǵa qurylys-montaj jumystary júrgiziledi. Nátıjesinde normatıvtik jaǵdaıdaǵy joldar respýblıkalyq jelide – 92 paıyzǵa, jergilikti jelide 87 paıyzǵa deıin jetpek.
Halyqtyń shaǵymdaryn eskere otyryp, osy jyly barlyq kúsh qurylysy uzaqqa sozylǵan 6 negizgi jobaǵa baǵyttaldy. Bul Taldyqorǵan - Óskemen, Qaraǵandy - Almaty, Merke - Býrylbaıtal, Aqtóbe - Qandyaǵash jáne Atyraý - Astrahan joldary.