Tórt túliktiń súıegine sýret salyp, erekshe kádesyı daıyndaıtyn aqtóbelik sheber

<p>Gúldana Serikqyzy &ndash; erekshe úlgide kádesyı daıyndap júrgen talantty ári sanaýly jastardyń biri. <a href="https://kaz.inform.kz/" target="_blank" rel="noopener">Kazinform</a> tilshisi bıyl Qazaqstan etnodızaınerler Odaǵyna qabyldanǵan aqtóbelik shebermen az-kem áńgimelesip, kópshilik qyzyǵýshylyǵyn týdyrǵan týyndylary jóninde surady. &nbsp;</p>

Onyń «Ómir jalǵasy» atty týyndysy az ýaqytta kórermen kózaıymyna aınalyp úlgergen. 

- Bul óz ómirimniń aınasy. Aldymen ózimniń qyz kúnim, keıin kelin bolǵan shaǵym jáne balaly bolǵan kez beınelengen. Ári qaraı qyzymnyń ár qadamyn qalt jibermeýge tyrystym. Túıindeý úshin sulý qalyńdyqty beıneledim. Qyzymnyń bolashaǵy jarqyn bolsyn, baǵy jansyn degen nıetpen maıly boıaýmen saldym, - deıdi sheber.

Foto: Gúldana Serikqyzynyń jeke muraǵatynan

Jaýyrynǵa salynǵan ár sýrettiń ýaqyt pen sheberlikti qajet etetini kórinip tur. Sebebi Gúldana Serikqyzy aldymen súıekti daıyndap, óńdep alǵan. Tehnologııasyna úńilsek, súıekti qaınatyp, maıynan, artyq eti men sińirinen aryltady. Keıin eki kún boıy keptirip, tazartady. Qurǵaq ári taza súıekke sýret salý da ońaı sharýa emes. Súıekke sýretti qaryndashpen salyp, keıin ústinen bastyrady.

- Jaýyryn óte juqa súıek. Sondyqtan adam beınelense aldymen basynan bastap salamyz, keıin súıek qyzsa aıaǵyna oıysamyz. Osylaısha qyzyp ketpeýin qadaǵalaımyz. Súıek óte názik, ol mort synýy múmkin. Eger sýret kúrdeli, elementteri kóp bolsa, jumys birneshe kúnge sozylady. Ózim eń aldymen kári jilikti kádege jaratyp kórdim. Keıin aýyldaǵy anama habarlasyp, kári jilik kerek dep aıttym. Ol qorapqa quıymshaq, jaýyryn, jambas, moıyn omyrtqa da salyp jibergen. Sodan tek kári jilik emes, ózgelerin de óńdeý týraly oı keldi. Tehnologııasyn eshkim úıretpedi, ózim izdenip, qııalǵa berilip, jańa dúnıe jasap shyǵardym, - dedi ol. 

Foto: Gúldana Serikqyzynyń jeke muraǵatynan

Sonymen birge Gúldana Serikqyzy asyqqa da sýret salyp, bezendiredi. Ol úshin iri qara men usaq maldyń asyǵyn paıdalanǵan. Tek ózi ǵana emes, oqýshylary da osy ónerge qushtar. Olardyń qolynan shyqqan buıymdar qazir suranysqa ıe.

- Balalar asyqqa qyzyqsa eken degen tilekpen asyqty óńdep, oıyn túrlerin túsindiremiz. Sonymen birge moıynomyrtqa da tazartylyp, «jańa týǵan náresteniń moıny tez qataısyn» degen tilekpen ilinetinin aıtamyz. Al kári jilikti «bosaǵamyz berik bolsyn, bále-jaladan saqtasyn» dep iledi. Ol týraly kóp izdenip, oqydym. Ańyz áńgimeler de bar, - deıdi Gúldana Serikqyzy.

Foto: Gúldana Serikqyzynyń jeke muraǵatynan

Aqtóbe oblysy Baıǵanın aýdany Bulaqtykól aýylynda dúnıege kelgen Gúldana aldymen kolledj, keıin ýnıversıtette «Dızaın-grafıka», «Beıneleý óneri jáne syzý» mamandyqtary boıynsha oqyp, dıplom aldy. Arnaýly orta jáne joǵary oqý oryndarynda bilim alyp júrgen kezde túrli kórmelerge qatysyp, sýretterin kópshilik nazaryna usynady. Aqtóbe qalasynyń «Týǵan jerim-nurly elim» atty kúnderi aıasynda «Dala boıaýlary» taqyrybynda jeke kórme de ótkizdi. Biraz jyldan beri jıǵan-tergeni aýdandaǵy eki mýzeıde saqtaýly tur. Keıde qaıyrymdylyq aýktsıondaryna qatysyp, týyndylaryn satýǵa shyǵarady. Baıǵanın aýdandyq shyǵarmashylyq ortalyǵy Dızaın úıirmesiniń jetekshisi búginde bar bilgenin shákirtterimen bólisip keledi.