Tórt túlik malǵa ıdentıfıkatsııa jasaıtyn aqparattyq júıe iske qosylady

ASTANA. QazAqparat – Aýyl sharýashylyǵy janýarlaryn birdeılendiretin aqparat júıesi iske qosylady. Bul jaıynda Aýyl sharýashylyǵy vıtse-mınıstri Ábilqaıyr Tamabektiń Májilistiń taratylǵan 7-shaqyrylym depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«Qazirgi ýaqytta «Aýyl sharýashylyǵy janýarlaryn birdeılendirý» aqparattyq júıesiniń mobıldi qosymshasy ázirlendi. 2022 jyldyń 27 qyrkúıeginde mobıldi qosymsha Memleket basshysyna Digital Bridge forýmynda tanystyryldy, ol ony maquldady jáne veterınarlardyń jumysyn ońtaılandyrý úshin jumysqa qosýdy tapsyrdy. Memleket basshysy maquldaǵan mobıldi qosymsha veterınarııa mamandarynyń jumysyn ońtaılandyrý úshin Batys Qazaqstan oblysynda pılottyq rejımde testileýden ótkizildi»,- dep atap ótedi vıtse-mınıstr jaýabynda.

Onyń atap ótýinshe, testileý nátıjesinde anyqtalǵan olqylyqtardy joıý boıynsha jumys júrgizilip jatyr.

«Veterınarııalyq qaýipsizdik» modýlin modıfıkatsııalaý boıynsha jumys júrgizildi. Atap aıtqanda, jańartylǵan bıznes-protsesterdi eskere otyryp, jańa arhıtektýraǵa jańa baǵdarlamalaý tiline qaıta jazyldy. Demonstratsııadan sátti ótkizildi. Qazirgi ýaqytta júıeni testileý júrip jatyr. 2023 jyldyń birinshi toqsanynda iske qosý josparlanýda. Tehnıkalyq jumystardyń qorytyndysy boıynsha qoldanystaǵy normatıvtik quqyqtyq aktilerge ózgerister engiziledi», - dedi ol.