Tórt óńirdiń jas ónerpazdary Tabyldy Dosymovtyń ánderin shyrqady
Bul baıqaýǵa Aqtóbe, Batys Qazaqstan, Mańǵystaý jáne Atyraý oblysynan 19 ónerpaz qatysty. Ánshiler baıqaý shartyna sáıkes gıtaramen án shyrqady. Alǵash ret ótken baıqaýdyń qorytyndy kontserti Mahambet atyndaǵy akademııalyq qazaq drama teatrynda ótti. Teatr zaly kórermenge lyq toldy.
«Eliniń, ultynyń shynaıy patrıoty ekenin isimen de, ánderimen de dáleldegen Tabyldy Dosymovtyń poezııasy men áni – artyna qaldyrǵan mol murasy. Onyń ánderin nasıhattaıtyn izbasarlary az emes. Bolashaqta ánderin shyrqaıtyn jas ónerpazdar kóbeıe tústinine senemin. Óıtkeni, onyń ánderiniń astarynda ómirlik maqsat, fılosofııalyq oı bar», - dedi oblys ákiminiń orynbasary Daryn Shamuratov.
Qazylar alqasy baıqaýdyń birinshi júldesine atyraýlyq ónerpaz Іzbasar Samıǵollaevty laıyq dep tapty. Ekinshi oryndy Batys Qazaqstan oblysynyń ókili Zıbatolla Eshqaev pen jergilikti ánshi Orynbasar Jumahanov ıelendi. Al, úshinshi júlde aqtóbelik Batyrbek Amanqulov pen mańǵystaýlyq Serikbol Jetibaevqa, atyraýlyq Azamat Jumaǵalıevke berildi.
Іs-sharada Tabyldy Dosymovtyń óneri men shyǵarmashylyǵyna arnalǵan «Samala sazdar saǵymy» kitaby tanystyryldy. Sondaı-aq Tabyldy Dosymovtyń uly Abyl Aıash, Ulttyq Ulan ansambliniń ánshisi Ashat Ámirǵalıev, jergilikti ónerpazdar men baıqaý júldegerleri óner kórsetti.
Eske sala ketelik, budan buryn atyraýlyq jigit 20 mýzykalyq aspapta oınaıtynyn jazǵan bolatynbyz.