Tórt óńirde pedagog tapshylyǵy bar - Ashat Aımaǵambetov

TÚRKІSTAN. QazAqparat – Atyraý, Mańǵystaý, Almaty, Túrkistan oblystarynda pedagog tapshylyǵy bar. Sondyqtan, atalǵan aımaqtarda jańa joba iske qosylady. Bul týraly oqý-aǵartý mınıstri Ashat Aımaǵambetov Túrkistan oblysynyń turǵyndarymen kezdesýinde aıtty, dep habarlaıdy QazAqparat tilshisi.

Mınıstr bıyl bilim salasynda jańa joba júzege asatyndyǵyn málim etti. Respýblıka kóleminde bilikti, bilimdi pedagogter iriktelip, muǵalim tapshylyǵy bar aımaqtarǵa jiberiledi.

«Joba alǵashqyda Atyraý, Mańǵystaý, Almaty, Túrkistan oblystarynda ótetin bolady. Sebebi, bilim berý sapasyn kóterýimiz kerek», - dedi Ashat Aımaǵambetov.

Sondaı-aq, mınıstr bıyldan bastap muǵalimderdi jumysqa qabyldaý jańa erejege saı júzege asatyndyǵyn jetkizdi jáne mektep dırektorlaryn rotatsııalaý isi aldaǵy ýaqytta jalǵasatyndyǵyn aıtyp ótti.

«Endi muǵalimderdi jumysqa qabyldaýdy dırektorlar sheshpeıdi. Bul jumys úmitkerlerdiń naqty jınaǵan baldary boıynsha, konkýrs arqyly, sandyq júıemen iske asady. Respýblıka boıynsha 500-ge jýyq dırektor rotatsııalaýdan ótti. Meniń oıymsha óte qajetti shara. Zańǵa sáıkes rotatsııa ınstıtýtyn jalǵastyramyz», - dedi ol.

Budan buryn habarlaǵanymyzdaı, Oqý-aǵartý mınıstri Ashat Aımaǵambetov Túrkistan oblysyn aralap júr.