«Tórt muǵalimniń ólimi»: Júrgizýshi 5 jylǵa bas bostandyǵynan aıyryldy
Qobda aýdandyq sotynda búgin tórt muǵalimniń ólimine sebep bolǵan jol-kólik oqıǵasyna qatysty úkim oqyldy. Sot barysynda anyqtalǵandaı, júrgizýshi jol erejesin saqtamaı, kólik pen kólik arasyndaǵy araqashyqtyqty buzǵan, jyldamdyqty rettemegen. Sot otysyrynda sottalýshy Asyljan Qoshtan óz kinásin moıyndap, keshirim surady. Jábirlenýshilermen ishinara medıatsııalyq kelisimge keldi.
«Zertteý qorytyndylaryna taldaý jasap sot sottalýshy Qoshtannyń qylmystyq quqyqbuzýshylyǵy QK 345-baby 4-bóligimen durys dárejelengen dep sesepteıdi. Óıtkeni ol «Lada Largýs» avtokóligimen Samara-Shymkent tasjolynyń 593-i shaqyrymynda QR jol erejelerin saqtamaı, aldynda, bir baǵytta kele jatqan júk kóligimen soqtyǵysady. Tórt jolaýshynyń abaısyzda ólimine ákep soqtyryp, eki jolaýshynyń densaýlyǵyna aýyr zııan keltirip, jol erejesi men tehnıkany paıdalaný erejesin buzǵan. Sot jaza taǵaıyndaý kezinde qylmystyq sıpaty men qoǵamdyq qaýiptilik dárejesin, sottalýshynyń jeke basyn, sonymen qatar qylmys jasaǵanǵa deıin jáne keıingi minez-qulqyn, jazany jeńildetetin jáne aýyrlatatyn mán-jaılardy eskeredi. Shyn nıetpen ókinýin, buryn sottalmaǵanyn, jábirlenýshilerdiń keshirimin, tórt jas balasynyń baryn qylmystyq jaýaptylyqty jeńildetetin mán-jaılar dep tanydy. Sot qylmystyq jaýapkershilikti aýyrlatatyn mán-jaılardy anyqtaǵan joq»,- dedi sýdıa Jánibek Seıitjaparov.
Sonymen birge moraldyq zalaldy óndirý týraly azamattyq talapty qanaǵattandyryp, A-nyń paıdasyna 5 mln, J-nyń paıdasyna 1 mln, T-nyń paıdasyna 5 mln moraldyq zalal óndirgen durys dep eseptedi. Qoshtanǵa azamattyq talapty oryndaý úshin 30 kún merzim berildi.
«Asyljan Qoshtanov QK 345-baby, 4-bóligimen kózdelgen qylmysty jasaýda kináli dep tanylyp, 7 jyl merzimge kólik quralyn basqarý quqyǵynan aıyra otyryp, 5 jyl merzimge bas bostandyǵynan aıyrý jazasy taǵaıyndalsyn. Jaza óteý orny - qylmystyq atqarý júıesiniń barynsha tómen mekemesi»,- dedi sýdıa.
Sot otyrysyna sottalýshynyń anasy da qatysty.
«Biz Batys Qazaqstan oblysynda aýylda turamyz. Balam Oral qalasynda turady. Oqydy, jumys istedi. Sońǵy úsh jyldan beri taksı qyzmetinde júr. Otbasyn ózi asyrady. Tórt balasy bar. Úlkeni bıyl mektepke barady. Kishisi tórt aılyq, múgedektigi bar. Kelinim úıde balamen otyr. Balam araq ishpeıdi, osy ýaqytqa deıin esh jamandyǵyn estimedik. Abaısyzda bolǵan jaǵdaı. Súrinbeıtin tuıaq joq. Birinshi Alladan, ekinshi qymbat jandarynan aırylǵan otbasylardan analyq keshirim suraımyn. Ózim de anamyn. Sábıler jetim qaldy. Ókinishten ózegiń órtenedi. Bárin de túsinemin. Qaıtys bolǵandar qatarynda meniń de balam bolatyn edi. Kórer jaryǵy bar eken. Esin bilmeı eki kún jansaqtaý bóliminde jatty. Áli de densaýlyǵy jaqsy emes. Aıaq-qoly synyp, basynan zaqym aldy. Eshteńeni esine túsire almaıdy. Bárinen keshirim suraımyn»,- dedi sottalýshynyń anasy Sandýǵash Kenjeǵalıeva.
Eske salsaq, oqıǵa bıyl maýsym aıynda boldy. Bir top oraldyq pedagog Aqtóbede dıplom alýǵa shyǵyp, jol-kólik apatyna ushyrady. Saldarynan tórt adam kóz jumyp, ekeýi aýyr jaralandy.