Tórt basty baǵytty aıqyndaıtyn «Jaıylymdar týraly» zań jobasy maquldandy
«Zań jobasynda 4 basty baǵyt aıqyndalyp, zańnamalyq sıpatta jeke baptarmen bekitilgen. Olar jaıylymdardy retteý, uıymdastyrý, josparlaý jáne basqarý júıelerimen qalyptasqan. Osy baǵyttardy is júzinde júzege asyrý úshin Úkimettiń, ýákiletti organnyń, oblys, aýdan, aýyldyq okrýgterdiń ákimshileriniń jáne aýdandyq ókiletti organ - máslıhattardyń, jergilikti ózin-ózi basqarý júıesiniń quziretteri belgilengen jáne jeke normalary engizilgen», - dedi zań jobasyn tanystyrǵan depýtat Jeksenbaı Dúısebaev.
Sonymen qatar onyń aıtýynsha, zań jobasynda óńirlerdiń tabıǵı jaǵdaılaryn eskere otyryp, olar ár deńgeıde bolǵandyqtan óńirler boıynsha mal basyn ustap-baǵý normatıvterin jasaý jáne bekitý quqyǵyn ýákiletti organnyń menshigine berý qarastyrylǵan.
«Aýdandyq jáne aýyldyq atqarýshy organdar jergilikti ózin-ózi basqarý júıesimen birlesip, árbir aýdanaralyq, aýyldyq okrýgterdiń jaıylymdaryna monıtorıng jasap, jospar jasaıdy. Jospar arqyly jaıylymdardyń kólemi, onyń ónimdiligi, baǵylatyn mal basy sany, qandaı kólemde jaıylymdardyń bos jatqandyǵy jáne mal basynyń qandaı jerlerde tyǵyz ornalasqanyn anyqtaıdy. Jaıylymdardy retteý jáne basqarý júıesi qurylady», - dedi Dúısebaev.
Onyń sózine qaraǵanda, jalpy alǵanda zań jobasy elimizdiń 187 mln. gektar jaıylymdyq jerlerin tıimdi paıdalanýǵa múmkindik týǵyzyp, mal salasyn damytý úshin jaǵdaı jasaıdy jáne qolda bar sharýashylyq sýbektilerinen kooperatıvter qurý úshin yntalandyrýshy faktor bolyp tabylady.