Tórt aıda 4,3 mln sharshy metr turǵyn úı paıdalanýǵa berildi

ASTANA. QazAqparat – Osy jyldyń 4 aıynda 4,3 mln sharshy metr turǵyn úı paıdalanýǵa berildi. Bul týraly Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

Mınıstrdiń dereginshe, osy jyldyń 4 aıynda oryndalǵan qurylys jumystarynyń kólemi 15,4 paıyzǵa ulǵaıdy.

Barlyq óńirde oń ósim tirkeldi. Ásirese qurylys-montajdaý jumystarynyń eń kóp ósimi Abaı, Jambyl, Qyzylorda jáne Mańǵystaý oblystarynda baıqaldy.

«Osy jylǵy qańtar-sáýirde 4,3 mln sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 19,9 paıyzǵa joǵary. Turǵyn úıdi paıdalanýǵa berýdiń eń joǵary kórsetkishteri Almaty, Shymkent jáne Astana qalalarynda, sondaı-aq Almaty oblysynda baıqaldy», - dedi ol.

Álibek Qýantyrov aýyl sharýashylyǵynyń jalpy shyǵarylymy 3,6 paıyzǵa ulǵaıǵanyn aıtady.

«Saladaǵy óndiristiń oń ósimi barlyq óńirde tirkeldi. Eń joǵarǵy ósimdi Mańǵystaý, Shyǵys Qazaqstan, Aqmola jáne Batys Qazaqstan oblystary kórsetti. 7 ekonomıkalyq kórsetkish boıynsha óńirler arasyndaǵy jalpy jaǵdaı mynadaı: barlyq kórsetkish boıynsha oń ósim 10 óńirde – Abaı, Aqmola, Batys Qazaqstan, Jetisý, Qostanaı, Qyzylorda, Pavlodar, Soltústik Qazaqstan jáne Ulytaý oblystarynda, sondaı-aq Almaty qalasynda baıqaldy», - dedi mınıstr.