Tóreliktiń biryńǵaı ınstıtýtyn engizýge baǵyttalǵan zań jobasy maquldandy - Májilis
«Zań jobasyn ázirleý tóreliktiń halyqaralyq qyzmetin quqyqtyq retteý máselelerin qamtamasyz etý maqsatynda halyqaralyq tórelik jáne aralyq sot qyzmetin retteıtin eki zańdy shoǵyrlandyrýǵa baǵyttalǵan. Osyǵan baılanysty aralyq sottar týraly jáne halyqaralyq tórelik týraly zańdardyń kúshin joıý usynylady. Sonymen qatar, zań jobasynda tórelik qyzmet salasyndaǵy zańnama normalaryn 1985 jylǵy tóralyq týraly halyqaralyq konventsııaǵa, 1958 jylǵy sheteldik tórelik qyzmetterdi taný jáne iske asyrý týraly Nıý-Iork konventsııasyna sáıkestendirý kózdeledi», - dedi Ádilet mınıstri Berik Imashev.
Onyń aıtýynsha, halyqaralyq tájirıbe boıynsha sheteldik zańnamalarǵa taldaý jasalyp, onda kóptegen elderde tórelik qaraıtyn daýlardyń bir zańnamalyq aktiler aıasynda reglamenttelgenin kórsetken. Al postkeńestik keńistikte bir mezgilde eki zań qoldanylady. Zań jobasyna sáıkes, tóreliktiń vedomstvolyq qaraýyna daýda halyqaralyq elementtiń bar-joqtyǵyna qaramastan, jeke jáne zańdy tulǵalar arasyndaǵy barlyq daýlardy jatqyzý usynylady.
«Tutastaı alǵanda zań jobasyna sáıkes, tóreliktiń biryńǵaı ınstıtýty engiziledi, osyǵan baılanysty halyqaralyq elementtiń bar-joǵyna qaramastan jeke quqyqtyq daýlar sheshiletin bolady. Osy jańalyq daýlardy sottan tys sheshý júıesin nyǵaıtý jáne damytýǵa oń áserin tıgizýi tıis. Bul rette tóreliktiń qaraýyna kámelettik tolmaǵandardyń, zańmen belgilengen tártippen áreketke qabiletsiz nemese áreketke qabileti shekteýli dep tanylǵan adamdardyń múddelerin qozǵaıtyn, múliktik qatynastarǵa baılanysty emes jeke múliktik emes qatynastardan týyndaıtyn, bankrottyq jáne ońaltý týraly, tabıǵı monopolııalar sýbektileri men olardyń tutynýshylary arasyndaǵy daýlardy qospaǵanda, barlyq múliktik daýlardy jatqyzý usynylady», - dedi mınıstr Berik Imashev.