Topyraq tósenishindegi maýsymda tabysty óner kórsetkim keledi – Elena Rybakına

ASTANA. QazAqparat – Topyraq tósenishindegi maýsymda tabysty óner kórsetkim keledi. Bul, árıne, densaýlyq pen kúsh-qýatqa baılanysty. Maıamı masters týrnırindegi fınaldyq oıynnan keıin Qazaqstannyń birinshi, álemniń 7-raketkasy Elena Rybakına osylaı aıtty, dep habarlaıdy QazAqparat tilshisi.

Baspasóz máslıhatynda saýaldarǵa jaýap bergen qazaqstandyq tennısshi aldaǵy jarystardan da sáttilik kútetinin jetkizdi.

- Sońǵy jyldaǵy tabystardan, ásirese, Ýımbldondaǵy jeńisten keıin kóktemgi jarystarǵa qandaı kóńil-kúıde kelmekshisiz? Ótken jylmen salystyrǵanda, qandaı nátıjege qol jetkizemin dep oılaısyz?

- Men ár oıynnan tájirıbe alamyn dep oılaımyn, al bir jyl az ýaqyt emes. Meniń maqsatym – eń bastysy, den saý bolyp, tabysty óner kórsetý. Eki sátti aptadan keıin de topyraq tósenishindegi jaǵdaıdyń qalaı bolaryn bilmeısiń. Sondyqtan oǵan durystap daıyndalý kerek. Bul asa mańyzdy. Osynshama matchtan keıin senim paıda boldy. Endi tek jaqsylap ázirlený ǵana qalyp tur. Taǵy da aıtaıyn, ýaqyt az. Kóbirek jattyǵyp, tehnıkalyq sheberlikti jetildirip, dene daıyndyǵyn da qalypty ustaý kerek.

- Jyl basynda hardtaǵy sııaqty, topyraq tósenishindegi korttarda da qıyn bolady dep oılaısyz ba?

-Ótken jyly topyraqta jaqsy nátıjelerge qol jetkizdim. Meniń oıymsha, onda tabysty óner kórsete alamyn. Sondyqtan bári de densaýlyq pen kúsh-jigerge baılanysty. Óıtkeni osynshama týrnırlerde únemi jolda júrý ońaı emes. Keıde basqa birdeńege alańdaısyń. Maıamıge sińlimniń kelý sebebi sol. Ol maǵan kómektesedi, sondyqtan tennısten basqa da ómirim bar.

Elena Rybakına sondaı-aq 13 matchqa sozylyp, Maıamı fınalynda úzilgen jeńis serııasyna baılanysty pikir bildirdi.

«Iga Shventekte budan da kóp serııa boldy, bul ońaı emes. Árıne, túbi jeńiletin kún týady, men basqany kútken joqpyn. Negizgi másele dene daıyndyǵynda, óıtkeni kóp jol júrýge týra keledi. Eń bastysy, qandaı ma bolsyn jaǵdaıǵa beıimdele bilý kerek», dedi qazaqstandyq tennısshi.

Qazaqstan tennıs federatsııasynan túsken málimetke qaraǵanda, E.Rybakına 11 sáýir kúni túnde Astanaǵa keledi. Sodan keıin 14-15 sáýirde elordada topyraq tósenishinde Bıllı Djın Kıng kýbogi irikteý kezeńi aıasynd ótetin Qazaqstan – Polsha matchynda el namysyn qorǵaıdy. Sosyn Germanııada Shtýtgart WTA 500 dodasyna qatysady.

Eske sala keteıik, budan buryn tennısshi Elena Rybakınanyń Maıamı týrnıriniń fınalynda jeńilip qalǵanyn jazǵan bolatynbyz.

Sondaı-aq Maıamı týrnıriniń fınalısi Elena Rybakına qansha tabys tapqany habarlandy.

Elena Rybakına Maıamıde 70-ke jýyq eıs jasap, tennıs tarıhynda rekord jasady.