Topyraq synamasy 75 gektardyń ornyna árbir 20 gektardan alynatyn bolady
«Qazirgi ýaqytta mınıstrlik joǵaryda atalǵan problemalardy sheshý baǵytynda birqatar sharalardy júzege asyrýda. Ósimdik sharýashylyǵynda, eń aldymen, naqty ártaraptandyrýdy júzege asyryp, óndiriske ǵylymı negizdelgen aýyspaly egistikti, zamanaýı resýrs únemdeıtin tehnologııalardy engizýdi basty maqsat retinde anyqtap otyrmyz. Sondaı-aq, tehnıkalyq jaraqtaný deńgeıin arttyryp, tuqym sharýashylyǵyn damytyp, osylardyń negizinde salanyń turaqty damýyna jaǵdaı týǵyzbaqpyz. Ol úshin birinshi kezekte jer paıdalaný protsesterin baqylaýdyń zamanaýı ádistemelerin ázirlep qoldanysqa engizýimiz kerek. Bul jerde ǵaryshtyq monıtorıng, Jerdi qashyqtyqtan zondtaý múmkindigin jáne topyraqtyń agrohımııalyq quramyn aıqyndaýdyń aldyńǵy qatarly ádisterin tolyǵymen paıdalaný maqsatynda egistikter men jaıylymdardaǵy ósimdikterdiń túrlik quramyn aıqyndaýdyń ádistemelerin arnaıy ǵylymı baǵdarlamasy aıasynda júzege asyrýdy qolǵa aldyq», - dedi E. Qarashókeev «Aýyl sharýashylyǵyn damytýdyń ózekti máseleleri men perspektıvalary» taqyrybyna arnalǵan parlamenttik tyńdaýda.
Onyń aıtýynsha, jospar boıynsha ony 2024 jyldan bastap óndiriske engizýdi qamtamasyz etpekpiz. Sonymen qatar, respýblıkalyq agrohımııa qyzmetiniń jumysyn jetildirýge qajetti qarjy bólinbek.
«Topyraqtyń agrohımııalyq quramy týraly aqparattyń dáldigin arttyrý úshin synamany irikteý ádisi ózgerýde. Endi topyraq synamasy búgingi 75 gektardyń ornyna árbir 20 gektardan alynatyn bolady.
Budan basqa, jer ınspektsııasy qyzmetin nyǵaıtý, onyń biryńǵaı vertıkalyn qurý jáne onyń aıasynda topyraqtyń qunarlylyǵyn baqylaý jónindegi bytyrańqy qurylymdardyń múmkindikterin biriktirý esebinen qurylymdyq sıpattaǵy sharalar qabyldanatyn bolady. Sonymen qatar, tuqym sharýashylyǵy júıesin tártipke keltirý jumystaryn bastadyq. Onyń ishinde ǵylymı uıymdardy selektsııanyń zamanaýı ádisterine kóshirý men Ulttyq agrarlyq ǵylymı-bilim berý ortalyǵynyń ǵylymı jáne tájirıbeli sharýashylyqtary negizinde tuqym sharýashylyqtarynyń úılesimdi júıesin qurýdy atap aıtýǵa bolady. Sol sııaqty tuqymdardy baqylaýdyń tsıfrlik júıesin ázirleý júrgizilýde, bul búkil el boıynsha tuqym materıaldarynyń qozǵalysyna qatań baqylaý ornatýǵa múmkindik beredi», - dedi mınıstr.
Onyń paıymynsha, osynyń bári ósimdik sharýashylyǵyndaǵy ahýaldy ózgertip, onyń damý turaqtylyǵyn jáne de básekege qabilettiligin arttyrýda naqty nátıjelerge qol jetkizýge yqpal etedi.
«Tek osylaı ǵana biz álemdik azyq-túlik naryǵyndaǵy básekelestikte óz deńgeıimizdi saqtaı otyryp, búgingi qol jetkizilgen eksporttyq potentsıalymyzdy odan ári arttyra alamyz», - dedi vedomstvo basshysy.
Budan buryn habarlanǵandaı, Erbol Qarashókeev saladaǵy negizgi problemalardy aıtty.
Salany memlekettik qoldaý máselelerinde de eleýli kemshilikter bar. Eń aldymen, bul sýbsıdııalaý tetikteriniń kúrdeliligi, sýbsıdııa alýdyń sharttarynyń kóptigi.