Topar kentindegi sibir jarasy: karantın alynyp tastaldy

<p>Qaraǵandy oblysynyń Topar kentinde 9 qarashada sibir jarasy boıynsha jarııalanǵan karantın alynyp tastaldy. Shekteý sharalary kezinde eldi mekende halyq pen mal arasynda ınfektsııanyń jańa jaǵdaılary tirkelgen joq, dep habarlaıdy <a href="Kazinform" target="_blank" rel="noopener">Kazinform.</a></p>

Sibir jarasy boıynsha karantındi alyp tastaý týraly sheshimdi zańǵa sáıkes Topar kentiniń ákimi Abaı aýdandyq aýmaqtyq veterınarııalyq baqylaý jáne qadaǵalaý ınspektsııasynyń bas memlekettik veterınarııalyq-sanıtarııalyq ınspektorynyń usynysy negizinde qabyldady. 

«Topar kentinde 9 qarashadan bastap karantın alynyp tastaldy. Shekteý sharalary kezinde arnaıy peshte dert anyqtalǵan ógizsheniń eti joıyldy, barlyq qajetti aldyn alý sharalary júrgizildi. Aýlalardy aralaý jáne dezınfektsııalaý jumystary iske asyryldy, barlyq mal vaktsınatsııalandy, halyqpen áńgime júrgizildi. Adamdar men mal arasynda ınfektsııanyń jańa jaǵdaılary anyqtalǵan joq. Biraq jaǵdaı baqylaýda bolady», – dedi Veterınarııalyq baqylaý jáne qadaǵalaý komıtetiniń Qaraǵandy oblystyq aýmaqtyq ınspektsııasynyń basshysy Erjan Beketbaev. 

Sondaı-aq ol vaktsınatsııadan soń maldy 14 kúnnen keıin ǵana qatań túrde tek arnaıy belgilengen jerde jáne veterınardyń qaraýynan keıin soıýǵa bolatynyn eskertti. Aýrý janýarlardy soıýǵa tyıym salynady. 

Eske sala ketsek, 26 qazanda Topar kentiniń ákimdigi jergilikti turǵyndarǵa eldi mekende karantın jarııalanǵanyn habarlaǵan bolatyn. Belgili bolǵandaı, bir úıdiń qojaıyny aýyryp turǵan 8 aılyq buqany soıýǵa májbúr bolǵan. Olar soıylǵan maldyń etin satýdy josparlamaǵan. Sol úıdegi úsh adamnan sibir jarasy anyqtaldy. Dárigerlerdiń qabyldaǵan barlyq sharalaryna qaramastan, sibir jarasyn juqtyryp, jan saqtaý bóliminde jatqan 1948 jylǵy patsıent qaıtys boldy.