Topan sý basqan áleýmettik nysandar qalpyna keltirilip jatyr

<p>ASTANA. KAZINFORM — Kóktemde sý basqan óńirlerde 67 áleýmettik nysan zardap shekken. Tolyǵyraq Ónerkásip jáne qurylys mınıstrliginiń aqparatynda.</p>

«Tasqyn sý basqan óńirler ákimdikteriniń aqparaty boıynsha, 67 áleýmettik nysan zardap shekti. Onyń ishinde, 5 densaýlyq saqtaý mekemesi, 39 bilim nysany, 8 mádenıet mekemesi, 9 sport nysany jáne 6 ákimshilik ǵımarat bar. Onyń ishinde Aqtóbe oblysynda 3 nysan sý astynda qaldy. Tehnıkalyq tekserý nátıjesi boıynsha 23 nysan qaıta salynady jáne 19 nysanǵa kapıtaldy, al 25 ǵımaratqa aǵymdaǵy jóndeý jumystary júrgiziledi», — delingen mınıstrliktiń agenttik joldaǵan saýaldyń jaýabynda. 

Vedomstvonyń aqparatyna súıensek, qurylys jumystaryna 100-den astam merdigerlik uıym, onyń ishinde 3500-ge jýyq jumys kúshi jáne 600-ǵa jýyq tehnıka tartylǵan. 

Sondaı-aq, mınıstrlikten úılerdiń qurylysyna elimizde óndirilgen, sapa baqylaýynan jáne tıisti sertıfıkattaýdan ótken materıaldardyń qoldanylyp jatqany málim etildi. 

«Búginde Soltústik Qazaqstan oblysynda 53 turǵyn úıdiń qurylysy bitip, turǵyndarǵa kilt tabys etildi. Odan bólek, úıin basqan azamattarǵa 2 276 turǵyn úı satyp alyndy», — deıdi mınıstrlikten.