Tońdym. Eki avtobýs almaı ketti: Taldyqorǵanda qoǵamdyq kólikter oqýshylarǵa toqtamaıtyn bolǵan

<p>TALDYQORǴAN. KAZINFORM - Áleýmettik jelige avtobýs almaı ketip, jylap turǵan oqýshynyń jazbasy jarııalandy. Taldyqorǵandyq jeli qoldanýshylary narazylyǵyn bildirdi.</p>

Oqý jyly bastalǵaly mundaı jazbalar jeli betine jıi jarııalanatyn boldy. Qala ishinde júretin qoǵamdyq kólikterdiń keıbiri aıaldamada turǵan balalarǵa toqtamaıdy. Onyń sebebin ata-analar Taldyqorǵan qalasy boıynsha oqýshylar tegin «Ońaı» kartasyn paıdalanýymen baılanystyrady.

«Meniń mektep jasynda úsh balam bar. Keıde úıge keshigip keledi. Qaıda júrgenin surasam, avtobýstar toqtamaıtynyn aıtady. Ras, ol. Úlkender birge tursaq toqtaıdy, aıaldamada ózderi ǵana bolsa, almaı ketedi. Sebebi olar aqsha tólemeıdi ǵoı. Qys bastaldy, mine kún sýytty. Qarańǵy erte túsedi. Avtobýstaǵylar endi olaı jasamaıtyn shyǵar» — dedi, Taldyqorǵan qalasynyń turǵyny Janar Skındırova.

Áleýmettik jelide jarııalanǵan jazbany túsirgen qala turǵyny oqýshyny «Juldyz» shaǵyn aýdany jaqtaǵy aıaladamada keziktirgen. Jylap turǵanyn baıqap, mán-jaıdy suraǵan. Bala 2 avtobýstyń toqtamaı ketkenin, sýyqta qatty tońǵanyn aıtqan.

Jazba astyna pikir qaldyrǵan 400-den asa jeli qoldanýshy Taldyqorǵanda mundaı jaǵdaıdyń kúnde kýási bolatyndaryn jazdy.

Eske salaıyq buǵan deıin Taldyqorǵanda avtobýsqa ornatylǵan beınekamera jol erejesin buzǵan kólikterdi túsirip alatynyn jazǵanbyz.