Tońazytqyshymda únemi qymyz turady – Túrkııa Elshisi Qazaqstannyń ulttyq taǵamdary týraly

<p>ASTANA. KAZINFORM &ndash; Túrkııa Respýblıkasynyń Qazaqstandaǵy Elshisi Mustafa Kapýdjý <a href="https://kaz.inform.kz/news/kazakstan-turkiya-intimaktastigi-aes-halikaralik-okigalar-elshmen-suhbat-7bb0e6/" target="_blank" rel="noopener">agenttikke bergen suhbatynda</a> Qazaqstannan alǵan áseri týraly aıtyp berdi. &nbsp;</p>

«Ázirge Almaty, Aqtaý, Shymkent, Túrkistan men Taraz qalalaryna barýǵa múmkindigim boldy. Aldaǵy ýaqytta da biraz shyǵys pen soltústik óńirlerge barýǵa nıettimin. Múmkindik týǵan boıda Óskemenge, Semeıge, Pavlodarǵa barýdy josparlap otyrmyn. Shynymdy aıtsam, munda alǵash kelgenimde esh jatyrqamadym. Astanaǵa da birden úırenip kettim, alǵashqy kúnnen-aq óz úıimde júrgendeı sezindim. Kóshege shyqqanda qazaq baýyrlarymyzdyń bizge qamqorlyqpen, mahabbatpen qaraıtynyn sezindik. Ásirese, túrkilerdiń rýhanı astanasy Túrkistanda Ahmet ıAsaýı, Arystan Bab kesenelerine barǵanda bul sezimderimizdiń tereńdeı túskenin baıqadyq», - deıdi Túrkııa Elshisi.

Sonymen birge Elshi Qazaqstannyń gastronomdyq erekshelikteri jóninde aıtyp berdi. Onyń aıtýynsha, Qazaqstan gastronomııasy – sondaı baı, túrli taǵam mádenıetiniń toǵysqan jeri. 

«Men jalpy kóp et jeıtin adam emespin, degenmen jylqy etiniń dámin kórdim. Qymyz – Túrkııada jıi ishiletin sýsyn emes. Biraq Qazaqstanda bolǵanda óz tońazytqyshyma alyp qoıýǵa tyrysamyn. Sebebi kelgen qonaqtarǵa qymyz usynyp, baýyrlas eldiń mádenıetine qurmet kórsetýge tyrysamyn. Árıne bul jerde et asý óte tanymal. Bul endi qazaq halqynyń ulttyq taǵamy, ulttyq taǵamǵa qurmet retinde et jemeıtin adam bolsam da dámin kóremin. Al baýyrsaq – eń jaqsy kóretin taǵamymnyń biri. Syrtta tamaq ishkende úlken mántini jaqsy kóremiz. Men negizi tamaqtanýǵa qatty mán beremin, óte kóp kalorııa almaýǵa tyrysamyn, biraq aıtylǵan taǵamdardyń dámin kórmeı otyra almaımyn. Syrttan tamaqtanǵanda eýropalyq restoranǵa qaraǵanda qazaqy meıramhanalarǵa barýdy qup kóremin», - deıdi M. Kapýdjý.