«Tomırıs» fılmine qansha qarajat jumsalǵany jarııalandy
«Fılmniń túsirilimine 10 mln dollardan az aqsha ketti. «Qazaq handyǵy» serıaly men basqa da fılmderdiń bıýdjeti de sondaı. «Qazaqfılmniń» bıýdjetinde eń qymbat fılm – Kóshpendiler. Ol týyndyǵa shetelden ártisterdiń tartylǵanyn bilesizder. Shetel mamanyn shaqyrý – kıno bıýdjetine qatty áser etedi. «Qazaq handyǵy: Almas qylysh» jáne «Qazaq handyǵy: Altyn taq» fılmin shyǵarǵan kezde bizge «Shyńǵyshannyń» 38 serıalyn túsirgen Batyr atty rejısserdi shaqyrdyq. Biz ony áý basta shaqyryp, ol konsýltant retinde jumys istep, aqyry bul fılmniń túsirilýine ol 50-100 mln dollar kerektigin aıtty. Aqyry, onyń qalaýy bizdiń oń jambasqa kelmedi de, onymen qoshtasyp, 10 mln dollarǵa «Qazaq handyǵyn» túsirdik. Al «Tomırıs» fılmine shamamen 3 mlrd teńge jumsaldy», - dedi «Qazaqfılm» AQ prezıdenti Arman Ásenov OKQ-da ótken baspasóz máslıhatynda.
Baspasóz máslıhaty barysynda Mádenıet jáne sport vıtse-mınıstri Nurǵısa Dáýeshev fılm bıýdjetin naqtylady.
«Tomırıs» fılmine 2 mlrd 259 mln teńge jumsaldy», - dedi ol.
Eske sala ketsek, rejısser Aqan Sataev osy jazda «Tomırıs» fılminiń treılerin jarııalaǵan bolatyn. Treılerde jaqyndarynan aıyrylǵan kishkentaı Tomırıstiń Saq patshaıymy laýazymyna deıingi ómir joly kórsetiledi. Onda Saq taıpalarynyń Parsy patshasy Kırge qarsy joryǵy kórinis tapqan jáne keıipkerler ejelgi túrki, ejelgi parsy tilderinde sóıleıdi.
Fılmge elimizdiń tanymal kınojuldyzdary Dımash Ahımov, Erik Joljaqsynov, Baıkenje Belbaev, Berik Aıtjanov, Erkebulan Daıyrov, Murat Bısembın, Azamat Satybaldy, Ádil Ahmetov, Aıjan Laıdjı, Aıan Ótepbergen, Asylhan Tólepov, Ashat Úrpekovter túsken.
Fılm 27 qyrkúıekten bastap prokatqa shyǵady.