«Tomırıs» fılmi AQSh-taǵy kınoteatrlarda kórsetiledi

NUR-SULTAN. QazAqparat - Qazaqstandyq «Tomırıs» tarıhı dramasynyń AQSh aýmaǵyndaǵy dıstrıbýtsııa quqyǵyn Well Go USA kompanııasy satyp aldy, dep habarlaıdy QazAqparat «Qazaqfılmge» silteme jasap.

«Amerıka Qurama Shtatynyń aýmaǵynda «Tomırıs» fılminiń dıstrıbýtsııa quqyǵy satyp alynǵany týraly Variety, Hollywood Reporter jáne Screen Daily basylymdary jarııalady. Osy mámileniń nátıjesinde Arclight Films kompanııasy qazaqstandyq dramanyń AQSh aýmaǵynda taratý quqyǵyn Well Go USA kompanııasyna satty», delingen habarlamada.

«Myqty áıelderdiń erligin pash etip, shynaıy oqıǵalaryna qyzyǵýshylyq tanytatyn álemde ómir súrip jatqanymyzǵa qýanyshtymyz», - dedi Arclight Films basshysy Gerı Hemılton.

Eske salsaq, kınotýyndy bizdiń zamanymyzǵa deıingi VI ǵasyrda bolǵan oqıǵany sýretteıdi. Fılmde kishkentaı qyzdan aıbyndy jaýyngerge aınalǵan, jaqyndarynan aırylyp, satqyndardan óshin alǵan jáne saq taıpalaryn biriktirgen uly dalanyń aty ańyzǵa aınalǵan Tomırıs patshaıymynyń taǵdyry baıandalady.

Fılm QR Mádenıet jáne sport mınıstrliginiń tapsyrysymen «Qazaqfılm» kınostýdııasynda Sataifilm kompanııasynyń qatysýymen túsirilgen.

«Bul epıkalyq fılm tańǵajaıyp peızajdarmen kórkemdelip, joǵarǵy sapada túsirilgendikten kórermenderdi birden baýrap alatyny sózsiz», - dep jazdy Variety basylymy.

«Tańǵajaıyp oqıǵalardy biz erekshe unatamyz. Sondyqtan da alǵashqy tarıhı «Amazon patshaıymynyń» qupııaǵa toly oqıǵasy basqalarǵa qaraǵanda senimdirek», - dedi Well Go USA Entertainment prezıdenti jáne atqarýshy dırektory Dorıs Pfardresher Hollywood Reporter tilshisine.