Tomırıs Baısafanyń isine qatysty sot tergeýi aıaqtaldy

ALMATY. QazAqparat - Máskeýde qaza tapqan qazaqstandyq stýdent Tomırıs Baısafanyń isi boıynsha sot tergeýi aıaqtaldy, dep habarlaıdy QazAqparat tilshisi.

«Sot tergeýi aıaqtaldy. Jaryssózder men úkim qaldy», - dep jazdy T.Baısafanyń anasy Janna Ahmetova áleýmettik jelidegi paraqshasynda.

Eske sala ketsek, 2018 jyldyń sáýir aıynda qazaqstandyq stýdent qyz Tomırıs Baısafa Máskeý memlekettik halyqaralyq qatynastar ınstıtýtynyń terezesinen qulap ketken edi.

Ol 3 mamyrda aýrýhanada qaıtys boldy. Qyzdyń ata-anasy sýıtsıd týraly tergeýshilerdiń nusqasymen kelispeı, tergeýdiń ádil júrgizilýin talap etti.

Keıinnen QR Adam quqyqtary jónindegi ýákili Asqar Shákirov Reseı Federatsııasynyń ombýdsmeni Tatıana Moskalkovaǵa Tomırıs Baısafanyń ólimin tergeýge kómek suraǵan edi.

2020 jyly Tomırıs Baısafanyń ólimine qatysty Daǵystan úkimetiniń burynǵy basshysy Mýhtar Medjıdovtyń uly Mýrtýzalı Medjıdov qamaýǵa alyndy.

Mýrtazalı Medjıdovke qatysty qylmystyq is Máskeýdiń Nıkýlın aýdandyq sotynda qaralady.

Foto: instagram.com/_ahmetova_zhanna_