Tom Leffler: «Kanelomen» aıqasta Golovkın tek tabystyń ádiletti bólingenin qalaıdy

ASTANA. QazAqparat - Gennadıı Golovkınniń promoýteri Tom Leffler meksıkalyq Saýl «Kanelo» Alvares qyrkúıekte GGG-men aıqasqa shyqqysy kelmeı turǵanyn málimdedi, dep habarlaıdy QazAqparat tilshisi Sports.kz saıtyna silteme jasap.

Qarymta kezdesý týraly kelissózder ázirge tyǵyryqqa tirelip tur. Sebebi, Golovkın aıqastan túsetin tabystyń bólinisin 50-de 50 dep bólýdi talap etýde. Alaıda Golden Boy Promotions kiristiń burynǵydaı bólingenin qalaıdy. ıAǵnı, Kanelonyń paıdasy 65 protsent bolady.

Lefflerdiń aıtýynsha, «Kanelomen» shyqqan kezde Mıgel Kotto chempıon bolǵandyqtan tabystyń 55 paıyzyn alǵan. Golovkınniń tarapy odan beri meksıkalyqtyń abyroıy aıtarlyqtaı artqanyn túsinip otyr. Dese de, báribir tabystyń teń bóliný kerek degen ustanymda.

«Golovkın - chempıon. Ol tek tabystyń ádiletti túrde bólingenin qalaıdy. Men «Kanelonyń» ustanymyn túsinemin. Ol GGG-dan góri qyrkúıekte jeńildeý qarsylastardyń birin tańdap alǵysy keledi. Mine, meniń oıymsha olar sondyqtan, teń dárededegi shartqa kóngisi kelmeıdi. Biz chempıon retinde Golovkınge kiristiń basym bóligin de surap otyrǵan joqpyz. Al «Kanelo» Golovkındi jeńe alatynyna senimdi bolatyndaı jaǵdaı týǵansha kútti. Biraq, ol báribir jeńe almas edi. Eger «Kanelo» revanshta basym túsetinine senimdi bolsa, bizde tabysty ádiletti túrde bólip alý týraly másele bolmas edi», - dep jazady Lefflerdiń sózin Los Angeles Times.