Tom Leffler: «Kanelo» revanshtan bas tartpaı turyp, opponent izdeý erte

ASTANA. QazAqparat - Gennadıı Golovkınniń promoýteri Tom Leffler Saýl «Kanelo» Alvarestiń ókilderinen revanshqa qatysty jaýap kútip otyrǵanyn málim etti. Degenmen, boksshylardyń qaıta kezdesýinen bas tartylǵan jaǵdaıda qosalqy josparlary baryn atap ótti, dep habarlaıdy QazAqparat Sports.kz saıtyna silteme jasap.

«Erık Gomes «Kanelomen» kelisimge keldik dese, ol ekeýimiz birden mámile jasasamyz. Biz tek Oskar men Erıkten «jasyl» tústi kútip otyrmyz. Eger qandaı da bir sebeptermen aıqas ótpeı qalsa, NVO-men naýryz jáne sáýir aılaryna eki datany rezervke qoıyp otyrmyz. Árıne, bul biz kórgimiz keletin baǵyt emes. Biraq biz eń jaqsy nusqany izdestirip tabýǵa tyrysatyn bolamyz. «Kanelo» revanshqa qatysty jaýabyn bermeı turyp, ózge opponentterdi talqylaýdyń jóni joq», - dedi Tom Leffler Fight Hub-qa bergen suhbatynda.

Buǵan deıin habarlaǵanymyzdaı, Gennadıı Golovkın-Saýl Alvares revanshynyń ýaqyty 2018 jyldyń 5 mamyryna belgilengen.

«Golovkınniń ókilderi kelisimin berip qoıdy, al Golden Boy Promotions basshysy Oskar de la Hoııa kelisimshartqa qol qoıý úshin osy aptada «Kanelomen» kezdesedi», - dep málim etken bolatyn meksıkalyq Fox Deportes arnasynyń júrgizýshisi Fernando Shvarts.

Jekpe-jektiń ótkiziletin orny ázirge anyqtalǵan joq. Degenmen, Dallastaǵy AT&T Stadium, Nıý-Iorktegi «Madison Square Garden» jáne birinshi aıqas ótkizilgen Las-Vegastaǵy T-Mobile Arena jekpe-jekti ótkizýge úmitker nysandar qatarynda.