Tolymbaı kólindegi balyqtardyń neden qyrylǵany belgili boldy - SQO
Esterińizde bolsa, 20 tamyz kúni SQO Jambyl aýdany Tolymbaı kólinde balyq jappaı qyrylyp, aýyl turǵyndarynyń úreıin ushyrǵan edi.
Tabıǵı apat bolǵan jerge ınspektsııa, Tabıǵat resýrstar basqarmasy jáne oblystyq ekologııa departamentiniń qyzmetkerlerinen quralǵan komıssııa baryp, birneshe qajetti synamany aldy. Búginde zerthanalyq saraptamanyń nátıjesi shyqty.
«Veterınarlyq zerthanada júrgizilgen saraptama men ekologtardyń qorytyndysy belgili boldy. Tekseris barysynda saraptamaǵa alynǵan sý men balyq synamalarynan úsh esege deıin artyq pestıtsıd pen tuz tabyldy», - deıdi SQO Orman sharýashylyǵy jáne janýarlar dúnıesi aýmaqtyq ınspektsııasy bóliminiń bas mamany Eldar Kákibaev.
Osy iske qatysty barlyq materıaldar quqyq qorǵaý organdaryna jiberildi. Kólge zııandy zattardyń qaıdan kelgenin quzyrly mekeme anyqtaıdy.
Jambyl aýdanyndaǵy Tolybaı kólinen jalpy salmaǵy 185 keli móńke balyǵynyń ólekseleri alynyp, órtelgen bolatyn. Mamandardyń esebinshe, qorshaǵan ortaǵa kelgen shyǵyn kólemi 200 myń teńge shamasynda.